祖馬龍心水│「日馳千里」隔紗還盅

更新時間：19:01 2024-10-19
發佈時間：19:01 2024-10-19

話說祖馬龍今次日本之旅非常愉快，最難得係相隔咗十幾年，終於同屋企人齊腳旅行。細佬計畫行程、祖馬龍充當司機、阿媽負責中央統籌、老豆同「氣勢」就係今次旅程嘅金主。上期我中咗條三串一，尾關「氣勢」個Win回飛有1.9倍。咁講，超得咁離譜嘅馬其實街市菠菜蓮都貼到，賠率又熱辣辣，確實無咩賭頭，不過如果以過關嚟講，可以一百變兩百，一千變兩千，一萬變兩萬，中到應一應就非常和味。留意番，祖馬龍其實一向提倡節制賭博，量力而為，依家討論緊嘅係因過關而帶嚟嘅雪球效應。正常人都唔會戇居搵一皮嘢一個月而賭一皮嘢「氣勢」，因為賽馬確實充滿變數，萬一隻馬塞車、慢閘、唔願出閘，就算馬王要輸你都真係吹佢唔脹。

「日馳千里」上場正係輸咗一堆馬王飛嘅一面倒大熱門，明明賽前課閘試得好，往績又有根有據，就算未開氣跑到七成都坐Q望W啦。不過，跑馬就係多變數，029場次「日馳千里」就慢閘你睇，鞍上人早段催策坐騎，導致馬兒搶口及在直路上未能追前，喺馬又衰、人又衰之下，上場敗績其實可以抹去。呢鋪人又換咗，隻馬又再試返課閘，經過上場隔一隔紗，即管信多佢一鋪，望退熱後本利歸還。

呢鋪投注策略「日馳千里」一注獨贏，另一注「日馳千里」搭「開心樂園」位置Q，其餘心水貼士就想玩大彩池先好參考。

第四場：4日馳千里、10開心樂園、3非凡達
第六場：1哈羅威、6球皇、4帥帥友福