《矛盾》林日曦繼續「零交流」　蔣麗芸發火：佢本雜誌仔就釘啦

更新時間：12:03 2016-05-04
發佈時間：10:48 2016-05-04

《100毛》創辦人林日曦與民建聯立法會議員蔣麗芸在首集《跟住矛盾去旅行》經已甚有火藥味，林日曦堅拒與蔣議員直接溝通，令氣氛甚為尷尬。而在昨晚一集中，兩人繼續「句句有骨」，蔣議員更一度發火：「我唔會再同佢繼續一個場合」，又揚言：「佢嗰本雜誌仔就釘啦，睇佢捱到幾耐！」
由於林日曦在首集堅持實行「另類社會實驗」，由導遊為二人用「廣東話翻譯廣東話」，經已令蔣麗芸甚為不滿。第二集甫開始，蔣麗芸在單獨一人時就曾抱怨林日曦：「咁唔友好？點解要咁呢？」其後二人為南韓一間義工組織整理服裝，林日曦被分配到擦皮鞋時就揶揄：「不過擦鞋呢家嘢我覺得，我做都得，不過可能蔣議員又叻叻哋喎。」
兩人其後擔當面試官角色，林日曦繼續進行「實驗」，令蔣議員不禁「黑面」：「邊個咁得閒同你實驗，有咩實驗啫啱唔啱呀？而家千山萬水嚟到韓國同你去搞實驗？」然後又「一輪咀」投訴，林日曦頓時離開走人，而蔣議員則怒氣沖沖：「係呀，我又唔係要同你做friend，同你做friend做乜鬼啫」、「佢嗰本雜誌仔就釘啦，睇佢捱到幾耐！」，然後明言不會再與林日曦身處同一場合，要求分開拍攝。最後兩人分開與脫北者交流，旅程終於告一段落。