郭晶晶誕8磅女老公陪出院　霍啟剛晒大仔錫囡囡新相：期盼做哥哥好久了

更新時間：20:08 2017-04-24
發佈時間：14:15 2017-04-24

霍啟剛、郭晶晶同大仔喜迎B女。

「跳水皇后」郭晶晶於2012年下嫁霍英東長孫霍啟剛，本月中傳出郭晶晶懷第二胎兼臨盆在即，老公霍啟剛亦在微博開心些牙大仔霍中曦（Lawrence）親吻晶晶的大肚照片，承認霍家再添家庭成員。原來郭晶晶近日已順利生B，誕下B女湊成「好」字！有報道指郭晶晶在老公霍啟剛陪同下，已在今日下午1時左右出院，兩公婆極力保護，不被傳媒拍下B女樣子。
再次榮升做爸爸，霍啟剛開心回覆本報：「多謝關心，今次囡囡健康，都足月，差不多8磅呀！BB出世非常順利，媽媽恢復都好好，醫生都話可以提前一日出院。大家都非常高興同興奮。多謝你哋關心呀！」霍啟剛更在微博上載大仔錫錫B女的溫馨照，並留言：「我們家庭增添了一名新成員，我們感到非常幸運和感恩！現在母女都平安，回家休息了！你看哥哥多乖，一點嫉妒都沒有，很疼愛小妹妹！很溫馨，期盼做哥哥好久了，看他很享受，還給妹妹買了個小禮物！」
另外，問「最美麗嫲嫲」朱玲玲是否很開心？霍啟剛代回應：「當然開心，總算係完成她心願，生我哋三個都係仔，終於有個孫女啦！」霍震霆再任爺爺開心不已，本報記者致電恭喜他時，他笑得開懷道：「多謝！很開心！（BB好靚女？）好靚女。（似媽咪？）都係，一出嚟都幾大個女，頭髮又多多。（諗到改咩名未？）都有啲諗法，你直接搵啟剛等佢報佳音啦！」