爆喊談婚變　黃宇詩遭男友前妻寸搏見報

更新時間：14:57 2017-06-13
發佈時間：12:23 2017-06-13

Cady指兩公婆齊齊報讀人生課程改善關係，前夫正正就是在課程中認識了第三者。

黃宇詩於2011年被指戀上人夫、測量公司董事彭慶餘（Peter），一直以來黃宇詩稱Peter回復單身才開始戀情。不過男友前妻Cady曾出示離婚書反駁她講大話，昨晚播出的無線節目《關你家事》中，Cady更喊晒口講返婚變經過，指第三者令婚姻破裂。雖然節目中未有講明「小三」及前夫真名，但已是「公開的秘密」。

身為繼母的楊娜，希望Cady的仔女得到無私的愛。

原本笑笑口的Cady，講到傷心處不禁拭淚，與前夫育有3仔女的她指，二仔出世後家庭出現經濟問題，兩公婆齊齊報讀人生課程改善關係，前夫正正就是在課程中認識了第三者。婚變後，Cady與前夫約見面傾談欲解決問題，不過她表示：「面對面傾，表面上係一位好好先生，坐低傾就火星撞地球，變成互相指摘對方。」經歷人生起伏，Cady一度懷疑自己患上抑鬱，同時又要安撫仔女情緒，當仔女問「點解爸爸唔返嚟？」、「爸爸媽媽會唔會一齊返？」Cady都自言不想答錯問題，怕影響仔女與前夫的關係，同時相信有可能會復合，有完整的家。離婚數年，Cady在半年前覓到成熟男子，走出陰霾開始新感情，節目中又提到第三者向傳媒重提Cady的舊事，更公開Cady及3位仔女的相片，令Cady陷入情緒困擾。Cady在節中明示作為藝人的第三者搏見報：「作為一個藝人都想被報道嘛，好嘅消息係新聞，唔好嘅消息都係新聞，要睇自己價值到咩位置。」不過Cady亦自言「唔到我理，都離咗婚，關我鬼事。」被問到會否曾想報復？Cady直言：「曾幾何時有，真係要搵個聆聽者，可以幫你保密嘅人。」