仔女獻唱感動爆喊家燕媽媽：長女為個唱搞到入院

更新時間：07:17 2018-12-06
發佈時間：09:11 2018-12-06

家燕姐透露男友有入場支持。

家燕姐紅館騷尾場順行完成，她出席慶功宴接受訪問時表示，完成個唱鬆一口氣，但心情好興奮，今次個唱籌備了半年，初時好大壓力，因為要唱十幾首歌又排好多舞，就連排舞師Sunny Wong話她跳舞多過郭富城，不過要記歌又記舞步，最擔心自己可夠魄力。她說：「一首歌只個分幾鐘換衫，所以跟自己講要做到最好。每日都練歌跳舞，可以做到自己想做的事。我覺得做到呢個演唱會係我畢生難忘的事，會見到親戚朋友對自己的支持，團隊亦好專業同好大付出。」

她直言長女珊珊為今次個唱幫手做統籌搞到入院，當三子女上台獻唱，令她忍不住落淚，當中播放的片段是子女找資料製作，覺得好有心思，加上在演藝界60年獲得大家支持同愛錫，認為人生無求，感覺好快樂同安慰。談到男友可有入場睇騷，她表現得含羞搭搭，便說：「應該有，人地睇唔到就算啦！（陳寶珠指未見過你男友！）無呀！在後台時都無見過，因為我在後台好忙，無辦法照顧佢，會影響我心情。」她笑言會作安排帶男友見「七公主」，但談到見明年可會成事？她說：「無咁快！以為你地話結婚。（蕭芳芳向你催婚。）唔好啦！馮素波都話成年忙到不得了，我娶新抱要黎又要安排同敬茶，又開演唱會，所以遲啲先啦！我個女結婚先啦。（長女珊珊結婚後到你？）搞掂珊珊先啦！」

提到個唱歌衫密實，問到是否為男友收起性感？家燕姐解釋好多跳舞動作，所以要有矜持，但男友睇到她的子女上台獻環節都話有喊，覺得好感動，也擔心她太辛苦，又透露舉行演唱會時男友有跟她握手，並坐在第一行，稍後也會與男友及家人到日本旅行。她說：「坦白講我唔會結婚，咁嘅年紀結乜婚呀！唔好要人唔安樂，要對人有交待。（與男友有共識不結婚？）好似蕭芳芳話我地有「景轟」，唔係滾。（清純愛情？）係囉！」