謝東閔「被降呢」好友　朱智賢車廂幽會人夫黎振燁

更新時間：18:04 2020-04-29
發佈時間：14:23 2020-04-28

朱智賢（前中）和黎振燁（左）昨日於車廂幽會斷正！

33歲落選港姐朱智賢（Ashley）昨日驚爆背男友謝東閔，跟有「翻版古天樂」之稱的港男兼人夫黎振燁（Jackson）搭上！一對「偷情男女」昨午更被發現於人跡罕至的屯門山路車廂密會，當時，正在後座甜蜜食蛋糕的二人被傳媒撞破後，隨即慌忙地烏低身、以雙手遮面，Jackson邊含住口蛋糕邊走上駕駛座，追問是否背棄偷嗒Ashley？兩人是甚麼關係？他口震震稱雙方「唔係一齊」，又叫大家唔好誤會；Ashley就坦承知道對方有老婆，跟Jackson只是同事，至於跟謝東閔的關係？她強調：「我哋一向都係好朋友。」

黎振燁跟初戀情人L小姐早於2015年結婚，目前太太懷孕8個月。

朱智賢與謝東閔於2017年傳出緋聞，二人更經常結伴出席Crazy Runner聚會。

但據悉，Ashley和Jackson上月因合拍新劇《食腦喪B》而撻着，飾演情侶的二人於拍攝期間已表現得親暱曖昧，更有指他們試過在外景場地離奇消失近兩小時，要工作人員發散尋人！然而2016年參選香港先生時，Jackson已表明跟初戀情人L小姐早於2015年結婚，目前太太懷孕8個月，想不到黎太臨盆在即，他卻背着另一半密會其他女性！

謝東閔忽然被降呢朋友關係，一眾粉絲也替他不值。

事件曝光後，兩位當事人即將Instagram（Ig）設為私人帳戶；外間就有傳無綫大為震怒，並已下「封嘴令」以免講多錯多，而原定昨午出席《機場特警》宣傳活動的Jackson亦臨時缺席。另有消息指，Ashley和Jackson打算於今日開記者會解畫。

至於近日忙為新歌《最冷的一天》宣傳的謝東閔，忽然被Ashley降呢朋友，不少網民都替他不值，並紛紛留言支持謝東閔：「唔好為Ashley傷心，佢唔值得你為佢傷心」、「加油！出面大把好女仔」等。