愛犬患淋巴癌第5期許亦妮自責生女後忽略照顧狗狗

更新時間：17:47 2020-09-08
發佈時間：17:17 2020-09-08

許亦妮自責生女後忽略照顧狗狗。

前港姐許亦妮（現名許芷熒）下嫁家族過億嘅Alexander後，今年2月榮升媽咪，誕下寶貝女「馮寶寶」，雖然有咗BB女，但堅持做一個好有責任感及有愛心嘅好主人，依然對雪橇狗Cooper及Enzo如珠如寶。

她昨日喺社交網站無奈指Cooper患上淋巴癌第5期，要馬上進行化療保命！慶幸 Cooper完成第一次化療後，精神及胃口也改善了不少，又反而自責誕下女兒後忽略愛犬，今後會更珍惜與Cooper相處的時光。

Whitney憶述Cooper由發病到治療經過說：「2020年8月23號，晚上我聽見狗狗Cooper 抖氣好大聲！感覺一定有啲問題出現，諗住觀察幾日，點知情況冇改善，然後有一日，我摸佢個頭同頸，摸到頸上面嘅淋巴已經發到好大！即刻book醫生睇！

2020年 8月28號，醫生已經初步確定佢係應該有淋巴癌。我哋問醫生通常咁嘅情況仲有幾耐命？醫生話，如果乜嘢都唔做，可能得返幾星期，食類固醇可能有幾個月，如果身體情況許可，做化療的話，可能有多12至18個月。知道咁嘅情況，嗰刻真係晴天霹靂！心裏面諗：『點會咁㗎！點會嚟得咁突然？我仲有好多嘢想同佢一齊去做，亦都好多自責嘅感覺，覺得點解冇早啲幫狗狗發現呢個病？又或者係咪有啲乜嘢自己做得唔好，令到狗狗有咁嘅情況？』

2020年9月1號，我哋立即帶狗狗去專科嘅獸醫醫院去見癌症科醫生。做晒所有檢查，之後確定Cooper係患上了淋巴癌。醫生話，Cooper應該是癌症第5期了，而且cancer 嘅毒素好高，要即刻做化療保命。

2020年9月2號，Cooper第一次做化療，好感恩 Cooper做完第一次化療情況已經有好明顯嘅康復！即刻精神咗好多！胃口亦好好！醫生話，通常淋巴癌復發嘅機會都好大！所以我哋大家都好珍惜同Cooper可以繼續見面生活嘅日子。買多啲生日蛋糕同俾多D啲Pizza畀佢食。其實我覺得，呢個係上天畀多一次機會我哋好好珍惜同愛Cooper。我自己亦有自我反省，覺得自己生完馮寶寶之後好似冇咁關注Cooper同Enzo，亦有可能因為咁，令到佢哋唔開心，其實狗狗會感受到的，當佢哋被忽略，或者唔開心，都會同人一樣可能會病。亦有一個靈性角度嚟睇，可能狗狗會覺得自己嘅使命已經完成，我哋已經唔需要佢，所以係時候去彩虹橋。所以上天現在畀多一次機會我去好好珍惜，我都會盡我一切能力，將時間同愛分配得更加平均。Cooper 將會要做為期六個月嘅化療，每星期做一次！希望一切順利！感謝上天，給我們多一點時間！」網民都留言叫她及Cooper加油，也大讚她是個好主人。