當年移民加國同老婆險離婚白彪留羊咩鬚改運攞埋男配獎

更新時間：18:07 2021-01-30
發佈時間：16:41 2021-01-30

白彪去年喜獲龍鳳胎孖孫，笑言帶挈爺爺得獎。

74歲白彪憑《香港愛情故事》獲萬千星輝頒獎禮「最佳男配角」，入行52年的他，於90年代移民加拿大後，也跟劇中人一樣同老婆嗌交嗌到離婚。他說：「當時冇乜戲拍，心情麻麻，兩公婆嗌交嘅時候又會口不擇言，我同老婆講咗一句『咁多樣嘢你識乜吖！』原來傷害咗佢，佢就記住喇！有一次我好衰，嗌到㷫起掟咗個花樽落牆度，仲掟穿咗個窿，為呢件事老婆要同我離婚，紙都差不多簽埋，好彩後來大家冷靜，老婆回心轉意……嗰個窿3個月都冇人理，我第一件事親手去補返個窿，連隨就補返埋段情！」
白彪稱兩公婆一定有拗撬，只要體諒，各自退一步，最重要勿提離婚兩個字。雖然現在跟老婆分隔兩地，但互相信任，老婆還讚他的戲好看。他說疫下一對龍鳳胎孫兒誕生，老婆也有回港探孖孫，但8月已返加拿大，因為一對孖孫在港不足月出世，他眼見就像兩堆麵粉仔，又因疫情關係他及家人均未能到醫院探望，只能靠護士上傳照片，實在擔心到不得了。幸好乖孫們現已學行，才放下心頭大石，為此感到開心。

白彪與米雪為第一代郭靖與黃蓉。

白彪看好當年青靚白淨演楊過的古天樂，晒黑後更不得了。

這位第一代郭靖至今難忘當年被金庸公開稱讚，因為夠戇居演郭靖最適合，白彪對其郭靖演藝路亦甚回味：「1995年喺無綫拍《神雕俠侶》拍住古天樂、李若彤，我第3次做郭靖駕輕就熟，喺大陸非常紅，四處登台，愈偏僻愈紅，個個都好崇拜我。當年古天樂青靚白淨，成個白面書生咁，嘩！好好記性，好專業，演得好自然，武打同動作都OK，古仔行出來成個楊過咁。當年我睇佢眉目氣質，睇出佢非池中物，佢演古惑仔、談情說愛、喜劇樣樣掂……佢晒黑咗仲好，個人sharp咗，男人味出晒嚟，改咗膚色，唔知點解啲運即刻到！」
白彪以自己為例，前三年沒太多工作，就試留羊咩鬚改運，即獲派演《愛．回家之開心速遞》雷公角色，然後有對龍鳳胎孖孫給他帶來好運獲獎。白彪又點評後輩，對林淑敏及羅天宇加以讚許：「我最欣賞大小姐林淑敏，佢做戲好流暢，每一個動作、表情，我都好欣賞！羅天宇性格戇戇直直又內向，外型都似郭靖，如為郭靖選角，佢嘅演繹方法都有八、九成似。」