頭條獨家丨旨呈因疫情與媽媽分隔兩地：今日一別唔知幾時再見

更新時間：16:35 2021-10-08
發佈時間：17:00 2021-10-08

旨呈話唔知幾時先可以再見媽媽！

樂隊「享樂團」出身的鄺旨呈（旨呈）去年參加ＶiuTV《全民造星III》，當時曾有報導指他是坐擁10億身家的闊少，媽媽是美容集團的創辦人兼主席曾裕。雖然家底豐厚，但旨呈依然努力在娛樂圈追夢，早前便有份參與的ViuTV節目《夕陽新丁》今晚播出結局。昨晚（7日）旨呈在IG貼上與媽媽曾裕的合照，言語間充滿着離愁別緒：「人生必須隨時準備好說再見，因為人間處處充滿著離別。再見了！娘親！不懂花言巧語，只能寄語碟上。」
今日旨呈接受《頭條娛樂》的訪問，問到媽媽是否返新加坡，他說：「係呀，其實佢而家喺嗰邊定居，對上一次返嚟差唔多係兩年之前嘅事，今次返嚟佢短暫停留10零日，唔覺唔覺原來已經係最後一日，係有啲唔捨得，所以噚日咪同佢一齊食飯farewell，不嬲都唔係好識講，我愛你或好肉麻嘢，所以咪寫咗喺隻度，仲送咗遊戲機俾佢，有個妺喺嗰邊，而家新加坡疫情都嚴重，好多時間都留喺屋企，所以等佢哋一家人可以喺屋企玩。」

媽媽都有睇旨呈的演出。

曾裕近年移居新加坡！

因為疫情的關係，不少地方都實施隔離措拖，所以問到下次幾時會再見，旨呈說：「其實呢個問題由噚晚到今朝佢上機，我都有諗過，我都好想見過阿媽，屋企冇咗佢喺度，好似有一種寂寞嘅感覺，平時我阿媽會捉我食飯，好多時都會陪住佢，突然間佢走，好自然諗起呢個問題，但係都要交番俾政府，若然唔使隔咁多日嘅話，我相信嚟一個短TRIP返嚟係容易嘅事，不過而家好多地方嘅疫情都好嚴峻，返嚟要隔離，返去又要做一大輪嘢，變咗佢都盡量以安全重，所以都唔知幾時可以再見到佢。」

旨呈在去年參加《全民造星III》。

不過，有網民笑稱兩人似姊弟多過似母子，旨呈笑說：「仲有又話似阿妹，又有人問係咪新女友，哈哈，我哋出親街啲人都好議，唔覺得佢係我阿媽，如果影相仲易呈現，甚至乎二汶老師都係講，我娘親都話而家上鏡係肥嘟嘟，到年紀大啲就會似我咁靚，會瘦啲，自動縮水。」旨呈更說：「兩年冇見，轉變好大，《造星》之後，返到嚟都知我喺工作上有好多轉變，佢都有認同同稱讚我今年嘅轉變好大，喺我角度都覺得佢老咗好多，慢慢覺得佢年紀大，更加有一種唔捨得嘅感覺。」
至於媽媽又有否睇目《夕陽》？他則說：「有呀，有一晚唔使做嘢，我開電視叫佢睇，一路睇一路笑，今次係佢第一次睇我上電視，叫我拍多啲呢啲節目，之前喺自肥係聽啲朋友講，嗰陣叫我好做埋啲咁核突嘅嘢，之後咪同佢解釋，明白咗就叫我做多啲，咁多年努力終於有節目出街，叫我加油同繼續努力。」