汪明荃效力TVB半世紀稱好夾欣賞自己勤奮創新捱得忍得

更新時間：20:41 2021-11-26
發佈時間：19:45 2021-11-26

阿姐自言同TVB好夾，畀到她發揮。

TVB節目內容營運總經理曾志偉、汪明荃（阿姐）、張振朗等今日出席將軍澳電視城的「長期服務暨傑出員工榮譽大獎頒獎禮2021」。近日有內地網民爆料指女友搭上譚詠麟（阿倫），身為阿倫好友的志偉以開會為由未有受訪，當頒獎禮結束後志偉應要求企定定拍照，其後急急腳離開。

為TVB效力50年的阿姐獲頒發獎項時，在場人士均起立並大叫「阿姐」。她坦言好感動，200多位同事為公司服務10年以上，覺得這份工有好多人都喜歡，又認為頒獎給員工是一種鼓勵：「我同TVB好夾，係畀到我發揮嘅地方，佢亦需要我呢個落力嘅員工，我都鍾意自己性格努力、勤奮、創新，做呢行要捱得、忍得，守住崗位。」談到將來可會拍劇？阿姐坦言暫時不會考慮。

曾志偉在台下拍照。

個個都效力TVB十年以上。

同場的張振朗已在TVB工作10年，他笑言時間過得好快，不經不覺已入行十年，好開心選擇做演員，在觀眾陪伴下見證他不同成長階段：「除咗得到十年服務獎，同時播緊台慶劇《拳王》，今次有好大轉變，每次都嘗試新事物。」談到在《萬千星輝頒獎典禮2021》與譚俊彥爭「最佳男主角」，張振朗表示希望大家都好，更笑稱二人是情侶，戥對方開心：「有日同佢講原來拍《包青天再起風雲》已經五年前，當時拍得好辛苦，我哋都話如果能夠去到最後五強已好開心。」問到入行十年可會以奪得視帝為目標？他坦言並非主要目標，反而每次盡力演好每個角色，當然獲獎會開心，但對獎項隨緣。當年曾扮張智霖的他，可想將來有人扮自己？張振朗說：「係都幾好，都係一個特別時刻，但我驚無得撈。」