【頭條獨家】年過40少女Look買餸　何倍倩唔怕凍晒腿飲凍嘢

即時娛樂

更新時間：14:04 2020-01-14
發佈時間：22:30 2020-01-13

事實證明唔使「中女三寶」都可以Keep得好好！講緊嘅係年過40的「恒生新抱」何倍倩（Anina），事關日前她落中環買餸，僅穿飄逸連身短裙仔晒腿又晒心口，其間仲買咗杯凍咖啡一邊啜一邊逛。而去年創辦健康App的Anina一向都食得好健康，當日亦主攻蔬菜、雞肉和魚，難怪成為3子女之母仍保養得宜啦！採訪：李權威

啲人成日話女人唔Keep好易老，年過30出街就必備「中女三寶」，即是頸巾、暖水和潤手霜，不過日前下午3點，已經4字頭的名媛何倍倩獨自現身中環IFC，其手袋裏有冇Hand cream就不得而知，但見她於10幾度微涼氣溫下，仍穿上鮮黃色連身裙襯短Jacket，不單止露出一雙幼腿，上身仲攤大個心口出嚟，唔知以為夏天，真係睇見都凍到打冷震！

Fit爆之謎
沒有頸巾褸住都算，一身少女Look的Anina仲走去光顧文青至愛的%Arabica，她於收銀處點完一杯咖啡後，便拎住張飛仔企埋一邊等一個人咖啡，其間悶悶哋咪同朋友WhatsApp吹吓水囉，結果發現原來Anina叫咗杯凍咖啡，真係完全破晒戒！之後，Anina好悠閒地挽住個手袋，一邊啜住行去city'super買餸，見她在冷藏食物區，揀了一堆三文魚、番茄仔、菜，仲有雞翼、雞蛋和鹹蛋等，大部分都含豐富蛋白質，未知這是否Anina Keep得咁Fit的秘訣呢？最後，她抽住一袋二袋等到司機來到便上車離開。