頭條獨家丨黃翊講明勁飆高音晒歌藝唔避忌搵蔣嘉瑩做個唱嘉賓

即時娛樂

更新時間：00:14 2021-11-22 HKT
發佈時間：01:00 2021-11-22 HKT

林曉峰與康子妮驚爆離婚，黃翊竟更被指係「第三者」，好彩獲老婆信任。

54歲的黃翊將於11月27日假麥花臣場館舉行《最愛的你2.0》演唱會，之前因為同經理人蔣嘉瑩坐喺公園傾公事，一度惹嚟「嗒人妻」小風波，好彩謠言止於智者，兩人強調行得正、企得正，日後也毋須避忌，所以蔣嘉瑩仍然是個唱嘉賓之一。問到會否搵埋傳過緋聞嘅康子妮現身？黃翊卻避忌說：「Rundown冇呢個安排。」採訪：方騫平攝影：沈健程

MIRROR係新生代歌手代表，黃翊希望大家嘗試聽吓佢哋啲歌。

黃翊揚言會唱到青筋都現晒。

3年前，黃翊的《最愛的你》演唱會反應唔錯，原先想乘勝追擊，只可惜受疫情影響，演出無期，不過經已有齊Rundown放喺個腦度備用，直至月前做完羅敏莊個唱嘉賓獲主辦單位邀請開show，因而火速成事。

樂壇百花齊放先好玩

除咗唱歌跳舞，今次黃翊會挑戰高難度，揀選張信哲、蕭煌奇嘅勁飆高音歌嚟唱：「自己唱高音都比較穩陣同有層次，希望可以晒吓歌藝。好多人成日講唔知新一代唱乜，搞到再冇興趣聽歌，我反而覺得唔同時代興唔同嘅嘢，大家要放開胸襟去進入佢哋嘅世界，聽吓佢哋表達乜嘢，大家各師各法冇話好唔好，係要百花齊放。而我係聲樂班底出身鍾意挑戰難度，要唱到青筋現晒先過癮。」對於喉嚨有個水囊，他表示唔會影響到唱歌，但醫生叮囑他要放鬆自己，好好休息！另外，到時太太陳存正及兒子都會捧場，笑言喺阿仔面前威吓。問到會否請埋康子妮做嘉賓，合唱同時澄清吓緋聞？黃翊即耍手擰頭：「唔會喇！傳聞又唔係事實，而且所有嘉賓都定晒落嚟。」