乘風破浪丨阿嬌Fans嫌海報影得唔靚郭采潔被指P到面目全非

更新時間：19:30 2022-05-19
發佈時間：19:30 2022-05-19

內地競賽真人騷《乘風破浪》（前名：乘風破浪的姐姐）近日公佈第三季參賽女星的名單，同時分享了幾輯海報，其中官方早前跟內地一本時裝雜誌合作，為參賽女星影的海報，網民都讚影得靚，個個都好有仙氣。不過日前官方再上載由節目組影的海報，有網民質疑部份女星的照片P得太勁、有啲Pose奇怪，有啲直情唔睇名都唔知邊個。

其中鍾欣潼（阿嬌）近日為節目減肥成功，被網民大讚V面回歸靚返晒，點知官方海報就影到她鼻大又露孔，面型亦似乎P得唔好，有少少怪，Fans都紛紛留言投訴：「還我美女嬌！」但好彩另一張官方宣傳相影得靚好多。至於她的好姊妹蔡卓妍（阿Sa）個樣就冇乜問題，不過個Pose就被批有啲老土，笑容亦都好僵硬，有網民問阿Sa係咪畀攝影師玩，叫佢擺個咁嘅Pose。

阿嬌Fans嫌官方海報（右圖）影得唔靚。

阿嬌呢張靚好多。

阿Sa張海報（右圖）笑容似乎有啲僵硬，網民覺得個Pose有啲娘。

另外台灣歌手郭采潔就疑似因為被官方過份P圖，雖未至於變網紅樣，但都唔太認到係邊個。網紅樣擔當就落喺薛凱琪（Fiona）身上，原來她除了自己拍片拍照P圖搞到被嘲變網紅樣，連影官方海報都被P到網紅樣咁，Fans都話鍾意Fiona清純樣多啲。除此之外，那英張海報都引起網民討論，有人話唔睇名仲以為係劉嘉玲去參賽呀！

更多最新疫情資訊，請到以下專頁瀏覽按此

立即下載 | 全新《星島頭條》APP : https://bit.ly/3yLrgYZ