洪嘉豪跟MC「分手」單拖開騷唔孤單陳蕾笑住詐型要求上台費被拒

更新時間：00:16 2022-11-04
發佈時間：00:16 2022-11-04

MC(張天賦)、洪嘉豪（Kaho)及陳蕾昨日到中環出席活動，吸引過百fans撐場，MC及Kaho更走近fans旁，拿着兩人的紙板互舉影相。3人對上一次同場出席活動已經是去年的事情，MC指能夠3人一起到場，感覺會較團結：「好有安全感，有啲咩事Kaho同陳蕾會幫我孭飛。」而陳蕾則指有什麼事情也可以交給Kaho。

之前兩男合體開show，提到Kaho將舉行個人演唱會，問到Kaho一個人開騷是否會感覺孤獨？他笑說：「我知道佢兩個永遠都會喺我身邊支持我，就算佢哋唔喺度，我都會感受到，但認真講我都緊張，希望順利、希望天氣好、發揮好。」正積極健身的Kaho強調不是要為了個唱騷肌：「演唱會唔一定係除衫嘅，驚喜可能就喺其他方面，未必係裸露。」

MC、Kaho曾合體開騷。

洪嘉豪笑言跟MC「分手」即將要單拖開騷。

MC就講明今次不做嘉賓，問MC會否轉做觀眾跟陳蕾去捧場？陳蕾聽罷後即反問「幾號？」而MC則笑指要看公司安排，不過陳蕾就笑住詐型，強調若然到時真的上台，就會收足錢：「唔好次次都因為同公司就要蝕畀佢，同埋愈熟就應該愈要畀個好啲嘅價錢。」對此，Kaho笑説：「咁你哋就唔好嚟！」

陳蕾就笑住詐型要求洪嘉豪畀上台費。

陳蕾在聖誕節將會跟岑寧兒（Yoyo）一起開騷。

另外，陳蕾在聖誕節將會跟岑寧兒（Yoyo）一起開騷，提到門票即將公開發售，她謂心情很緊張又期待，因很多人也會覺得她跟Yoyo的演繹風格不一樣，亦透露到時候兩人會互相揀選對方歌曲演繹，期望能帶驚喜給大家，她又自爆最初知道在聖誕開騷，所以特別揀選了一些聖誕歌，不過公司卻叫她不要誤會，因為這是音樂會而不是聖誕騷。問到三人是否有一起開騷的打算，Kaho表示也希望，但公司看起來卻沒有這種想法。