王祖藍亡父保險金被親戚一借無回頭 曾捱兩年11蚊碟頭飯做多份兼職幫補家計
發佈時間：17:00 2022-12-29
在內地發展多年的王祖藍最近接受港台節目主持周振基訪問，從小在屋邨長大的王祖藍，提到昔日就讀演藝學院時，因為父親患絕症，要做兼職幫補家計外，更有兩年時間要捱11蚊碟頭飯度日，令人相當心酸。
【點擊睇王祖藍訪問】：
王祖藍自小在馬鞍山恆安邨長大，與容祖兒和黃翠如同邨，更是小學校友：「我同黃翠如家姐、容祖兒係同一班，大家都係屋邨出身，好平，千零蚊租，由邨校一直到中學，其實都冇諗過自己入呢行。」之後王祖藍中學畢業後，入讀演藝學院，他自嘲說：「因為唔係好讀到書，又因為細細粒，冇人留意，追唔到女仔，唯有上舞台先令人哋睇返自己，彌補自卑嘅缺陷。入咗演藝學院之後，亦真係愛上演戲、唱歌。」
不過王祖藍讀書時因為爸爸身患絕症，家境清貧而過得非常辛酸：「有兩年爸爸患絕症，有一年時間佢要做化療唔開得工，嗰陣政府好好，申請到綜緩同類似傷殘津貼。嗰陣媽媽又會去樓下屋邨茶餐廳做幾個鐘兼職，我係full grant full loan（全額學費資助及低息生活貨款），所有錢都係畀晒屋企分配，自己嘅兼職就希望養到自己。」後來父親離世，人壽保險金被親戚借走，卻有去無還，結果王祖藍為家計轉做幕前，棄做導演。
畢業後王祖藍要償還學費，要做兼職幫補家用：「記得嗰陣有幫港台做兒童節目、寫廣播劇，幫主題樂園寫音樂劇歌詞，又會出去教班、做吓咖喱啡，乜嘢都做，能夠搵錢嘅都會。」慶幸當時在港台做兼職，令他有廉價碟頭飯飽肚：「兼職香港電台，員工優惠救咗我哋好多日子，11蚊碟頭飯，每日就靠11蚊嘅乾炒牛河、免治牛肉飯呢啲，咁樣就好開心，好飽㗎喇！」
王祖藍北上發展多年，是最早打入內地綜藝市場的香港藝人之一，他對內地市場亦有一番見解：「我睇住成個轉變，最初好多時都係參考香港，佢搵得我上去都係可能當年內地冇專業模仿嘅人、綜藝或遊戲競技類嘅人，所以當年好希望我哋呢啲有經驗嘅港台藝人入去，刺激吓佢哋節目。」不過內地影視進步神速：「5年內佢哋已經發展得好成熟，我2014、2015年拍《跑男》嘅時候，就係成個國家綜藝最鼎盛嘅時候，嗰陣已經好豐富、百花齊放。內地成個綜藝市場已經幾乎全部由內地人去支撐，變咗新一代香港藝人入去已經有困難。」
王祖藍於訪問中亦提到香港電視業發展，他表示今年最開心是「香港人睇返電視」：「我覺得大家大方啲，除咗我哋之外，無論咩電視台，成個大環境收視都高咗，其實應該要百花齊放。」他未來還有兩大目標，包括改革網絡與電視互動、為香港藝人打開內地市場等。訪問中主持不斷盛讚王祖藍好靚仔，問到他當初如何追到李亞男，王祖藍笑說：「佢同你一樣都係要配眼鏡，佢同我講竟然覺得我靚仔，我自己都覺得冇乜可能，情人眼裏出西施。」
【其他閱讀】：
苟芸慧聖誕與闊太聚會驚見黃長興舊愛 90年代樂壇小花變證券公司副總裁
48歲向海嵐「升呢」做老闆娘 谷胸兼任代言人 擺甫士違反人體工學狂扭腰
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
