獨家丨謝高晉榮升老闆好想跟古仔學嘢 楊埕何天嵐探訪兔仔籲勿衝動飼養
發佈時間：08:00 2023-02-01
踏入兔年，謝高晉、何天嵐、楊埕希望新一年大家都做隻安全兔，健健康康跳躍事業高峰。謝高晉去年跟朋友合資經營工程公司，承接消毒及裝修工程，做老闆之餘都想演藝事業有新突破；楊埕稱去年因為疫情，幕前工作捧蛋，只能靠party room等生意頂住；新人何天嵐就想似師姐施匡翹接多啲job。採訪：方騫平 攝影：鄧國良 服裝：Marcoroom2046 & Hugbubble(謝高晉)、iBLUES & bashparis(楊埕)、bashparis & Hugbubble(何天嵐) 髪型：Nelson Cheung、Wingkee Makeup 化妝：Gabby Lam、Wingkee Makeup 造型：Marcoroom2046 場地及兔仔：I Love Rabbit
謝高晉、何天嵐、楊埕一齊去探訪可愛嘅兔仔，三人異口同聲表示，兔年必定會掀起養兔熱潮，呼籲大家勿衝動飼養，不要讓「兔兔」在本命年受苦。愛錫小動物的謝高晉家中有雀及貓，今次首度接觸兔仔，他知道兔仔生命較脆弱容易受驚，還要餵草料，每天要有足夠「放風」時間，而且又愛咬斷家中電線，絕對較貓狗難養。
楊埕曾亂養白兔
楊埕的十歲細佬曾養過大白兔，兔仔喺花園自由奔放生活，但成家人唔識養亂餵紅蘿蔔，及後因為搬屋將兔仔轉送朋友，不過，她承諾會好好照料白雲執回來的柴犬，不會棄養。何天嵐知道飼養寵物負擔大，為咗要做個負責任嘅主人，首要條件要搵到錢才考慮。
另外，謝高晉去年榮升工程公司老闆，會幫老人院及學校做消毒，及設計裝修工程，問到可會向古老闆(古天樂)請教做成功老闆的心得？他笑說：「我做乜都係學習中，如果有機會同佢合作拍戲，會請教佢點解咁有型？因為有型好重要，有型就會有口碑，然後再請教佢，演技上如何建立到個人風格。」
《星島頭條》APP經已推出最新版本，請立即更新，瀏覽更精彩內容：http://www.stheadline.com/
