54歲彭羚近照曝光孖老公飛英同黃偉文賀壽面形圓潤髮量少網民嘆歲月不饒人

更新時間：13:30 2023-05-18
發佈時間：13:30 2023-05-18

90年代天后級歌手彭羚（Cass）自1998年下嫁林海峰後便淡出歌壇，雖然已鮮有公開露面，但偶爾也會在社交平台分享做運動的影片，去年林氏伉儷一度現身英國與好友黃偉文（Wyman）敘舊，三人合照公開後勾起不少粉絲回憶。昨晚（17日）黃偉文於IG貼出彭羚最新近照，原來兩公婆日前靜靜雞飛英，跟周日（21日）54歲牛一的他「快閃」慶生，令一眾網民大感驚喜！

【點擊睇彭羚近照】：

黃偉文於帖文中寫道：「從天而降、突擊倫敦的林氏伉儷。前日寫詞，如常通宵，朝頭早10點都未瞓，個人開始『溫溫燉燉（瘟瘟沌沌）』唔係好function到之際，突然收到彭小姐WhatsApp：“What a you doing tonight ?” 雖然突然，但我其實已經估到（因為佢上次都係咁嘅套路），就答“Nothing special”。結果當晚都係冇見到，但第二日下晝飲咗70分鐘快閃下午茶，人哋本來『旋風式訪英48小時』探女，但都抽咗珍貴嘅一粒鐘見我，只係因為想同我“have an early birthday drink”。」

黃偉文續憶述三人離別一刻的催淚畫面：「飲完茶臨走嗰吓，今次互相擁抱得特別耐，呢件事發生係我同林太身上一啲都唔出奇，但咁多年都冇試過我鬆咗手林公子都未放手，溫暖，但我知如果問佢，佢一定會懶唔care咁話『係咩？可能飲咗少少酒姐。』#人大咗 #由超低能勁搞笑變成勁浪漫超溫馨 #呢份突如其來嘅溫暖真係 #天衣無縫嘅時間恰到好處嘅份量 #好過晒乜嘢生日禮物 #順便一問我用快閃呢兩個字算唔算令人尷尬嘅過氣潮語哈哈哈」

相中，飲下不少紅酒的林海峰滿面通紅，身旁的彭羚和黃偉文則有默契地穿上黑白「情侶裝」加墨鏡，看到二人親密撓手，有網民即抵死留言：「如果唔睇字，張相似你兩個嚟探林公子多啲」、「你成日都同林太襯啲」；至於久違的54歲彭羚髮量變得稀疏，不單止面形較以往圓潤，連鼻都明顯闊了不少，有網民則慨嘆歲月不饒人、昔日偶像老了不少。

此外，對於這個三人「夢幻組合」再合體，一眾網民紛紛大讚經典兼又Warm又Sweet，更有不少網民強烈要求彭羚復出歌壇：「好耐冇見過彭羚…好掛住佢嘅歌聲」、「好懷念林太配上你歌詞的聲音，今晚要懷緬一下」、「我好貪心，希望你說服林公子畀林太出嚟唱下歌…公開嗰啲」。