獨家丨71歲程可為首公開被靈體索命險死 人生多奇遇遇賊入屋苦心勸收手
發佈時間：07:00 2023-05-27
71歲的程可為(大姑)，兩年前不獲TVB包薪續約，入行逾50年已回復自由身的她樂得輕鬆。約大姑做訪問，被她帶住穿梭時空，21歲曾遇過令她毛骨悚然的撞鬼經歷、51歲獨居時被賊仔爬水渠入屋行劫，大姑自言做人行得正企得正所以都能化險為夷，她寄語做人要實際，唔好佔人便宜：「欠債個數冇得走係要還嘅，個天會睇住唔會入錯戶口。幾多恐怖命案由愛到唔愛而動殺機，好危險呀。」採訪：方騫平 攝影：朱偉彥
「御用阿媽」程可為效忠TVB 50年冇變過心，當年有電視台高薪挖角3次都不為所動，但兩年前改簽一年一騷，感覺被公司「離棄」，不過明白到近年經濟環境差，雙方冇對錯，目前已放下：「我唔傷心喇，TVB每年仲有一騷搵我，我一定會返去。」
連環惡夢獲高人解救
一直循規蹈矩，多年來從未傳出負面新聞的大姑有好多奇遇，她首次公開超恐怖撞鬼經歷，「50年前仲讀緊訓練班，當時家住九龍城唐樓，有晚收工喺樓下閘口聽到阿媽叫我乳名，之後持續6晚發夢都見同一副棺材，旁邊有對男裝尖頭鞋，然後有把老人家聲對我講『我好鍾意你，想你做我老婆！』夢中我就同佢理論話『大家係兩個世界嘅人，而且無仇無怨，根本冇可能一齊…』」及後媽咪安排她到附近的診所睇醫生，靠食安眠樂安睡，但10日後停藥惡夢再來襲：「嗰次佢仲叫我企上去花架，好彩我仲清醒知道咁樣做會跌死，嬲到爆粗。」但當時她已變到有氣冇力，失魂落魄，阿媽再次畀錢她去睇醫生，去診所路上竟遇上一位「高人」跟她說：「你我相遇係緣份，睇你個樣時日無多好論盡…」並教她返歸叫阿媽去一個地方，做一啲幫她保命的方法。說也奇怪，一直唔信她撞鬼的媽媽見她聲淚俱下，跪地求救後照「高人」說話去做，自此惡夢消除，不過，求救內容要一世保密。
唔信有一生一世愛情
問到遇上索命靈體是否跟「不婚之謎」有關？大姑唔敢肯定，但就一定跟信任有關：「𠵱家社會變化太大，出面引誘太多，自己都唔敢擔保一生一世愛一個人啦，何況要保證對方愛你？做人實際啲好，一定要靠自己，唔好佔人便宜，幾多恐怖命案由愛到唔愛而動殺機，好危險，唔好玩呢個遊戲。」
勸賊仔勿再挺而走險
另外，大姑又於31年前試過家中遇劫：「嗰晚個賊等我瞓咗先爬入屋，入房拍醒我，我裝作鎮定摸黑行去客廳畀咗7萬幾現錢佢，直覺覺得佢對數字幾滿意，感覺佢唔會傷害我，對方讚我鎮定仲要求同我傾偈，我就勸佢回鄉做啲小生意，唔好再挺而走險，仲打開大門畀佢離開，佢堅持喺邊度嚟就喺邊度走，我喺房睇住佢爬渠九秒九落返地下，好驚險，事後我都冇報警，但嚇到對腳係咁震。」大姑冇打算退休，現階段好享受人生：「我畀得起錢食嘢及揼骨，想開工又有人肯搵我，我好滿足㗎嘞。」
《星島頭條》APP經已推出最新版本，請立即更新，瀏覽更精彩內容：http://www.stheadline.com/
