61歲張學友開騷鬼馬表演一字馬 多次台上擘髀全因契媽肥姐經典演出
發佈時間：18:32 2023-06-13
現年61歲的歌神張學友上周五開始在澳門展開最新巡演「張學友60+巡迴演唱會」，雖然暫時未有香港站，但已經宣佈接下來會到新加坡、馬來西亞、武漢等地演出。張學友巡演近日在澳門開鑼，前晚（11日）舉行的場次，張學友竟然於台上表演一字馬，雖然歌神平常少跳舞，但依然柔軟度驚人！
【其他閱讀】：張學友演唱會丨馬來西亞個唱票價貴到嚇窒歌迷！坐山頂位竟要呢個價 歌神遭批坑人勁冇面
【點擊逐格睇張學友一字馬】：
近日網上流傳張學友周日舉行巡演澳門站第三場，已經年過60的他在台上大呻自己已經年老，還呼籲台下觀眾要做運動，寶刀未老的他更即場表演一字馬！他一邊擘髀，一邊笑說：「唔好以為我做唔到，條褲緊啫！」接着再蹲下一點點，繼續說：「唔好以為我做唔到，對鞋『啜』啫！」然後繼續：「落啲！落啲！落啲！」終於成功做到一字馬，加上鬼馬表情，場面相當搞笑，雖然只有僅僅兩秒，張學友已即時彈起，但台下觀眾亦即時報以歡呼聲聲。
其實今次並非張學友首次在演唱會上表演一字馬，2011年於紅館開騷，當時唱畢紀念沈殿霞的歌曲《肥姐》後，輕鬆做出一字馬更開心舉V。張學友與肥姐在電影《南北媽打》結緣，更成為肥姐的契仔。肥姐在2008年離世後，張學友之後推出歌曲《肥姐》紀念契媽，2011年開騷更苦練一字馬，重現肥姐昔日經典一字馬表演。
其後張學友也多次在演唱會表演一字馬，2018年他在台北小巨蛋舉行演唱會，當時已經57歲的他在台上說：「我快57歲了，還能這樣跳不簡單。」還問現場歌迷是否有看過他表演一字馬，之後更即席劈腿。翌年張學友在高雄開唱，正值盛傳張學友即將封咪，當時他闢謠說：「會繼續唱的，如果可以唱、可以跳的話，不管我是60、70歲！」更表示60歲再辦演唱會時，還可以表演一字馬。今次張學友演唱會更以歲數「60+」作名字，果然對然承諾再次表演一字馬！
【其他閱讀】：
歐陽震華晒TVB小生世紀飯局大合照！ 兩個藝訓班同學年過60唔識老
58歲郭晉安親民作風意外反擊「醫美過度」 零濾鏡相片真實樣令人驚訝
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
