獨家丨嘉盈霸氣回應憑夠膽自爆黑歷史 出靚相散文集遭連登仔質疑冇資格
發佈時間：07:00 2023-07-07
近年經常現身ViuTV節目，擁33E好身材的網台「熊仔頭」成員嘉盈（王嘉盈），唔只撈埋電影，今年書展更會推出首本圖文並茂散文集《KAYING’s Wordings》，自認才疏學淺的她無意做才女，只想跟Fans分享感受，及畀自己留個紀念。書中敢言性格不變，但性感相欠奉，原來作風大膽的她都有嘢驚，但此舉就令網民相當失望。採訪：杜杜 攝影：羅安強
因去年有出版社邀約，25歲的嘉盈好想試新嘢而答應，「我有兩個IG account，大嗰個有超過28萬人follow，細嘅得4萬幾人，所以有時心情唔好，好放心喊住打一堆嘢上去，出版社覺得啲隨筆幾得意，就搵我將呢個概念擺落書。」她強調並非想走才女路線，「朋友share時話我係才女，真係尷尬到漸凍症，老實講我真係才疏學淺，我見連登有人問我憑咩出書，憑我夠膽攞自己嘢出嚟講，講自己以前好鍾意講大話。」
自製小禮物贈Fans
向來大方勁鍾意在IG分享性感靚相的嘉盈，今次出書竟走保守路線，她解釋：「唔想遞畀阿爸阿媽時尷尬，同埋睇返轉頭唔想有後悔感覺。」因未知仲有冇下次，自資近10萬的嘉盈可謂不計成本，「寧願貴少少，可以印得好啲，大家睇晒之後都有花瓶嘅作用。」至於銷情她並不擔心，「賣唔賣得都好，唔需要有暢銷呢個title，我都唔係寫書嘅人，只係送畀Fans嘅禮物，一個紀念。」
將於書展舉行簽書會的嘉盈尷尬多過興奮，「覺得憑咩出嚟同佢哋聚會，仲要揸住支咪同佢哋講嘢。」除了簽名和合照，寵粉的她還準備自製小禮物送畀Fans，但就未決定當日衣著，「我着衫好睇心情，唔會因為要同觀眾近距離就包到實，最緊要靚。」而她亦唔擔心有瘋狂粉絲埋身，「我有個光頭經理人頂一頂，如果有啲瘋狂粉絲太有侵略性，我會嚴厲斥責，對Fans唔會齋呵，覺得唔啱會講。」
《星島頭條》新網站有更多精彩內容：http://www.stheadline.com/
