獨家丨韋羅莎嚇親唔再任《造星》導師 吳海昕羨慕193轉數快又夠癲
發佈時間：06:00 2023-07-14
由韋羅莎（Rosa）、吳海昕（Sofiee）、胡麗英、ERROR成員郭嘉駿（193）、白只、朱栢謙和「阿卵」楊偉倫演出的舞台劇《Laugh Vacation》將於10月27日上演。劇中一人分飾多角，做開舞台劇的Rosa及胡麗英覺得冇難度，前者認為做《造星V》導師難得多，所以試咗一次就夠；Sofiee嫌自己太悶，想變得癲啲。採訪：方騫平 攝影：羅安強 髮型及服裝：Ray Mork、Eas Fu@AdmiX Hair Styling、LOEWE、Levi’s (韋羅莎及胡麗英) 化妝及服裝：Lu Gary Athena Kitty @Lumakeup.me；Onki Lau、Maje(吳海昕) 造型：PIPA Creative(吳海昕)
爆笑舞台劇《Laugh Vacation》反應熱烈，已火速加開6場，共演16場。劇中講述經歷半世紀的酒店要結業，一班奇形怪狀、充滿住壓抑的城市人在酒店「最後一夜」check in後，解放他們的貪婪、慾望、好奇、自我滿足和精神，並以不同方法去宣泄，胡鬧得來唔低俗。
佩服193零包袱
演開正劇及主持人的Sofiee嫌自己太乖、太悶及太認真，好期待跟一班喜劇演員合作，令自己變得癲啲，「雖然冇同193合作過，但睇過《花姐ERROR遊》，佩服佢可以冇包袱演出，而且193轉數快，個人九唔搭八好亂嚟，又百厭，好好呀，相反我太正經喇，好值得向佢學習。」
至於Rosa及胡麗英都要一人演多角唔會有壓力，後者指此情況在舞台劇經常發生；Rosa認為場口分得好就冇問題。問到Rosa任《全民造星V》導師難定做舞台劇難？她認為是兩回事：「因為從未試過以導師身份做電視節目先接受挑戰，對住班囝囝近半年，投放心神幫佢哋做想做嘅嘢，雖然預咗有人唔喜歡，但拍咗幾個鐘，出街節目僅得一粒鐘，大家經歷嘅同眼睇係兩個世界，冇得解釋，大家有自己角度，我只能接受埋個節目，呢個係好特別、好正嘅經歷，但唔得喇，經歷過一次就夠，真係thank you very much，都係繼續做返舞台劇。」
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
