星8卦｜「人妻」食仔無數老公唔怕戴綠帽有苦衷

更新時間：11:00 2023-07-18
發佈時間：11:00 2023-07-18

「人妻」真係犀利，最叻係拍一次戲就勾搭上一個拍檔，通常係做情侶，最重要次次認真，愛到要生要死。但咁唔代表「人妻」嘅演技好呀！

第一個梗係數「元氣」，兩個人直情當全世界無到，假戲真做到有後續，「人妻」承認其中一個仔係同「元氣」生，不過自己有老公，唔使對方負責，反正老公又唔知。呢兩公婆都好得意，因為老公係圈外人，「人妻」未入行已經結婚生埋仔，但生得一副賢妻好女人格局，觀眾又好受落。

最後「元氣」主動提出分手，「人妻」又無所謂，佢周圍同人講呢個女人需索無度，晚晚搞到筋疲力盡，都唔知點解生出一副好女人模樣，呃晒全世界，離開佢係自救，幾愛都係假。之後「人妻」食咗豹子膽，竟然同「大俠」撻着，有次係化妝間錫嚟錫去，全行認咗第二無人敢認第一嘅惡人「大婆」衝到佢兩個面前，一巴二巴摑落「人妻」塊面，全場睇住無人敢出聲，「人妻」至知食錯人夫。

「人妻」而家仲係好開胃，見到啱嘅都照埋身，溝到咪一齊，溝唔到就當無事發生。或者大家會問點解屋企嗰個戴咁多綠帽都唔介意？除咗因為係米飯班主，靠「人妻」養家，佢仲周圍話畀人知多謝出面啲男人幫手，因為自己滿足唔到佢喎，問你服未！