獨家丨游嘉欣炒車瞓地扮被拖行超投入「A0女神」大學畢業瞓身做打女

即時娛樂

更新時間：08:00 2023-07-21
發佈時間：08:00 2023-07-21

23歲「A0女神」游嘉欣以半工讀形式完成城大管理學系學士課程，目前是全職演員，所以瞓身拍劇。日前她與TVB上位小生吳偉豪為林志華監製新劇《非常檢控觀》拍外景，《頭條日報》記者現場直擊，見游游被安排瞓地演出，笑住配合，表現專業。採訪：方騫平攝影：鄧國良

游嘉欣及吳偉豪喺新劇《非常檢控觀》中佔戲頗重。

游嘉欣拍劇表現專業。

着上畢業嘅袍游嘉欣，以半工讀形式完成城大管理學系學士課程。

當日天文台發出雷暴警告，游嘉欣及吳偉豪(Ricco)到土瓜灣拍外景唯有爽手啲，劇情講述吳偉豪駕電單車追住「鐵騎士」游嘉欣要取回證據，搞到游游不慎炒車著地，由於Ricco有電單車牌，故揸電單車對他冇難度，飛車鏡頭則交由特技人代勞；反而游游就要由兩位劇組人員扶住車尾推她向前扮「行駛」。

雖然炒車著地一刻有替身，但游游都要補返瞓地shot，見她分別瞓喺鐵板及紙皮上被劇組拖行，接著又側身倒臥地上，劇組叫佢做乜就做乜，好聽話。游游不單唔怕受傷，反而愈拍愈起勁：「其實最初有啲擔心，好彩有頭盔，佢哋又試晒位，加上有鐵板隔住身體磨擦都安全嘅，所以好放膽拍，既然行唔到性感就做打女啦，我做開運動筋骨都鬆軟嘅。」問到完成學業後，演藝路上係咪想急起直追，追返TVB新一代上位小花席位？她大笑說：「好難追，先做好本份。」游游最想跟偶像鍾嘉欣合作，趁嘉欣目前忙湊仔，先練好演技。