「群姐」許思敏自揭一原因接拍三級片被黃秋生摸胸咬面壓力大到失眠

更新時間：13:10 2023-08-17
發佈時間：13:10 2023-08-17

有「TVB御用師奶」之稱的67歲甘草演員許思敏，近年憑《愛回家之開心速遞》飾演「群姐」而大受歡迎，入行逾30年的她經常於劇集中扮演三姑六婆角色，不過其陳年舊照近日於網上瘋傳，驚揭她年輕時十足《網中人》時期的鄭裕玲（Do姐）般省鏡！早年拍不少電影的許思敏更曾有大膽演出，日前接受娛樂新聞台《星光路上》訪問時，大談當年接拍三級片的因由。

【相關閱讀】：這9位藝人竟是混血兒？視后38歲得知「身世」天后原來有多國血統

【點擊睇許思敏訪問】：

具1/8俄羅斯血統的許思敏年青時是美女一名，自80年代參與香港電台教育電視演出，及後以特約演員身份參演多齣影視作品，至2022年中與TVB簽約成為基本藝人合約藝員，過去她曾拍攝《真情》、《卡拉屋企》、《餐餐有宋家》、《秋香怒點唐伯虎》等劇集。在電影方面，許思敏於90年代三級片盛行時期，曾演出《香港舞男》、《屯門色魔》、《聊齋艷譚續集：五通神》及《八仙飯店之人肉叉燒包》等，其中尤以《人肉叉燒包》八仙飯店老闆（劉兆銘飾）一家被滅門最經典，扮演老闆娘的許思敏被殺人犯（黃秋生飾）摸胸又咬爛面；另在《屯門色魔》中，她則被男主角李家聲姦殺。

對此，許思敏於訪問中直認「執二攤」：「電影公司好似曾經搵過一、兩個演員做媽咪角色，但因為有場戲講秋生哥係會觸摸胸部，佢哋就唔肯演，咁就搵到我，話『思敏姐，你試吓演』，咁我都有思想鬥爭，要我演場咁嘅戲？我又驚影響我嘅家人、囝囝，佢哋話『呢個角色好正面喎…同你做戲嗰個係秋生哥喎』，我都好仰慕秋生哥嘅演技，咁我又貪玩又想挑戰自己，就應承話去演。」並謂當時拍了兩、三日，但由於壓力過大，搞到兩晚都失眠。

拍強暴戲撞腫面

翌年拍攝《屯門色魔》，許思敏大爆被屯門色魔（李家聲飾）強暴戲份的內幕，「講嗰場戲好似大家有啲接觸咁，但我只不過自己做，導演教我『你掹住鐵欄，自己郁吓郁吓做個動作啦』，咁撞吓撞吓後，第二日返去洗面，原來塊面撞腫咗，咁冇所謂都拍完嗰場戲。」被問到此後可曾想過做女主角？她坦言從沒想過：「做主角嘅壓力實在好大，我唔想畀自己咁多壓力，同埋人到中年冇謂咁多思想。」

轉戰電視圈後，許思敏表示沒想過「群姐」一角如此入屋，亦很開心獲網民封「No.1女神」，笑言跟「鮮肉、中肉、老肉、臘肉」發展感情線都無所謂：「最緊要出嚟嘅效果係好，我係冇所謂，做戲冇問題！」問到是否獲丈夫和兒子支持做戲？她說：「點解我好少提我老公呢？佢冇出過聲話支持我，亦都冇話反對…我都冇理佢，哈哈！同啲仔傾吓就得，佢哋長大又有自己嘅家庭，覺得你鍾意做你喜歡嘅嘢咪做囉，而且又做得咁受歡迎、咁入屋，佢哋覺得好有面子，所以冇咩聲氣！」