星8卦｜「正氣」娶「溫柔」打響如意算盤遇着刁蠻阿媽遲早玩完

更新時間：11:00 2023-09-22
發佈時間：11:00 2023-09-22

如果啲老人家唔識做，真係害到後生一輩，尤其嗰啲戀仔狂，直情對做新抱嘅嚟講，唔嫁好過嫁。因為出身背景相似，都係同一行，所以「正氣」同「溫柔」遇上好有天造地設嘅感覺。

問題係「正氣」出生於破碎家庭，阿媽一直同「正氣」好親密，佢都有諗過第日有新抱自己點樣好呢？當「正氣」帶「溫柔」返屋企時，阿媽即刻黑面，畀晒說話「溫柔」聽，經過好一段時間，「溫柔」用咗好多方法至令阿媽唔好單單打打。好在「正氣」明白事理，好多時喺屋企受咗氣，佢就對「溫柔」特別好，基於難得有情郎同埋愛情大過天，「溫柔」都無乜細想就決定嫁畀「正氣」，雖然阿媽實在好難頂。

婚後生活如何？咪好似搶咗人哋個仔咁成為阿媽眼中釘，不但無辦法搬出去住，仲要日日食飯唔可以一齊坐，新鮮煮嘅就阿媽同「正氣」食，「溫柔」只可以同工人姐姐清咗前一晚嘅餸菜，食食埋埋身體遲早都出事。最慘「溫柔」有名你叫，已經好就得人，「正氣」都以為娶呢個一定搞掂阿媽，後嚟佢見勢頭越來越唔對，同阿媽講話要搬出去住，但阿媽成個癲晒，要生要死，「溫柔」都唔敢出聲，掉轉頭叫「正氣」忍吓，不過最近聽講兩個唔係好掂，已經分居咗，但「正氣」努力箍煲，今次真係唔知點好，但「溫柔」再同佢一齊，遲早搞到情緒病，都係及早離開為妙。