獨家丨黑妹姐兩次患癌靠睇開啲保健康搵韋綺姍彭家麗齊開慈善騷

更新時間：08:00 2023-10-01
發佈時間：08:00 2023-10-01

黑妹姐、韋綺姍（Rita）和彭家麗（Angela）將於本月舉行《星濟•好聲音慈善音樂會》，由黑妹姐旗下慈善團體籌辦，不扣除開支全數捐給兒童癌病基金。曾兩次患癌的黑妹姐現在精神奕奕，自言全靠好友鬧醒才能保健康。採訪：杜杜攝影：Stanley 場地:STUDIOMETA

三人認識多年，Angela是第1次跟黑妹姐和Rita一齊開騷。

黑妹姐向朋友募捐演唱會製作費，「每人捐1萬蚊，反應幾好。」

黑妹姐在疫情期間跟好友組成「星濟義工團」，幫助弱勢社群，去年更成功申請成為慈善團體，即更改個人騷形式，「我想延續媽媽意願，佢以前唱粵曲會將門票收益唔扣除開支，全數捐畀兒童癌病基金，既然係自己善團第1次做騷，做返媽媽呢個動作。」

Rita感激黑妹姐肯畀機會一班沒舞台經驗的學生上台。

Angela當晚除跟《中年好聲音》學生演出，還邀請神秘嘉賓相助。

活動有意義齊撐

Rita和Angela異口同聲，只要黑妹姐開聲就會支持，而Rita更完全為報恩，「黑妹姐咁有義氣成日幫人，好記得新秀後發展唔好，去咗台灣發展兩年，返香港冇嘢做，佢介紹我去啲地方唱歌，等我有返啲收入，呢件事喺我心目中唔會忘記，所以佢出聲一定做。」加上活動很有意義，母親患癌離世的Angela，感受特別深，「我作為陪伴者或者同行者，都覺得好無助，我哋支持到兒童癌病基金，除咗幫到小朋友，亦都幫到全個家庭。」

三人日前出席記者會，Rita還帶了一班有份演出的學生亮相。

Angela剛完成澳洲慈善之旅，舉行了幾場慈善演出。

2017年黑妹姐發現頸椎有個直徑4厘米腫瘤，為免有中風危險，接受長達7小時手術割除。2019年她再發現腦及肺分別有腫瘤，又切除左邊肺葉保命，2020年她再因頸椎問題，在疫情下完成多1次手術。訪問當日見黑妹姐精神奕奕，皮膚好到連粉底都不用搽，她強調狀態和心態轉變有關，「嗰時有病，有朋友講咗句說話，『如果你再唔放低，乜都擺晒喺心裏面，你個病就唔會好』，我聽完後爆喊，釋放咗出嚟，明白心情真係好影響個病。」Rita和Angela都感受到黑妹姐轉變，「佢𠵱家真係唔鬧人，仲成日笑！哈哈！」