獨家丨林子博唔急搵第二春以仔女為先 回港見大恩人獲汪阿姐送福字真跡
發佈時間：07:00 2023-10-04
喪妻近3年的無綫娛樂台前主播林子博，2021年8月帶同一對仔女移居英國展開新生活。早前一家3口返港度假，子博拜祭亡妻之餘亦入院接受切除口水腺瘤手術。闊別香港兩年，子博仍然感受到濃濃的人情味，絕非人走茶涼，尤其與曾出手支援他度過難關嘅「大恩人」阿姐(汪明荃)及家燕姐(薛家燕)重聚，阿姐更送上祝福，及「福」字真跡，鼓勵林子博一家好好生活。採訪：方騫平 場地：Odans studio
52歲林子博跟一對子女相依為命，留港期間不時陪大女詠渝上跳舞堂，「暖男老竇」企埋一邊拍下練舞片段外，更跳埋一份。已經18歲的林詠渝由4歲起做童星，被指由細靚到大，子博爆囡囡係A0，有朋友卻想做媒，介紹28歲精算師富二代畀囡囡認識，但阿女冇乜反應，反而為他著急，仲幫他加入交友apps搵伴。
子女將來最重要
對囡囡嘅好意，子博形容得啖笑，直言冇嘢緊要得過子女，甚至保證唔會顧住媾女掉低屋企：「𠵱家最親係佢哋，望住對仔女就會諗起過咗身嘅老婆，我唔會因為喪妻鑽牛角尖變得消極。」乜都以子女為先的子博，甘願放棄理想及第二春，「佢哋嘅將來比我嘅夢想更加重要，否則我唔會離港。希望栽培到佢哋大學畢業，有學士證書傍身，咁樣先對得住老婆。」子博坦言子女未必理解佢嘅苦心，相信大個咗總會明白。「好彩佢哋都算生性，即使比較鍾意香港嘅繁華生活，都唔會荒廢英國嘅學業。」
天瑜爸爸好偉大
父兼母職嘅子博強調自己唔算係偉大爸爸：「只係盡返做爸爸嘅責任，好多父母比我偉大，好似因為醫療事故淪為植物人嘅7歲女童周天瑜，佢爸爸3年嚟一直為囡囡嘅事奔波勞碌，最近更患上惡性肌肉腫瘤及確診肺癌三期，佢嘅經歷比我痛苦得多，我有關注天渝爸爸狀況，自己曾經做過照顧者角色，明白到唔好打擾佢，默默支持及祝福佢就夠。」
家燕姐讚有膽色
林子博在港1個月晚晚都跟朋友聚會，就算離開兩年友情依然不變。提到當日兩位阿姐曾出錢，助他應急醫治患癌太太，包括汪明荃送中秋月餅，原來鐵盒內藏拳頭咁大卷的千元鈔票，而家燕姐亦有封利是及介紹著名西醫。今次子博帶埋子女跟兩位恩人飯聚，答謝她們的關心：「阿姐見詠渝及卓楠已長高好多，追問兩人學業成績及鼓勵佢哋畀心機讀書，阿姐仲趁住上書法班，用毛筆寫咗個福字，蓋上印章『加持』送畀我哋；而家燕姐就讚我夠勇敢，居然膽粗粗帶住細路去一個陌生地方生活。」子博表示一家人去英國生活另一個原因係爭取親子時間：「當地交通冇咁方便，子女要靠我車出車入，喺香港佢哋只要手持一張八達通卡，就可以成日唔見人。」
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
