彭楚盈案丨翁靜晶揭死者生前曾自稱遭強姦頭顱與避孕套共處垃圾桶重要證物竟遺失

更新時間：17:30 2023-10-06
發佈時間：17:30 2023-10-06

前女星翁靜晶早年轉行成為律師，更曾因揭發大埔定慧寺帳目混亂以及住持釋智定的醜聞而被網民封正義俠女。近日翁靜晶開設YouTube頻道「危險人物2.0」，分享早年辦過的案件及所見所聞。近日翁靜晶於YouTube頻道再談起1999年女模彭楚盈白骨案，受到網民關注，日前更新影片談到案中很多證物不翼而飛，翁靜晶直言感奇怪。

【點擊睇翁靜晶再談彭楚盈案細節】：

翁靜晶早年做過廣播節目《危險人物》主持及推出著作《危險人物》，分享奇案收獲不少忠實Fans，翁靜晶最近開設YouTube頻道「危險人物2.0」，稱希望將過去的事再作分享當作紀錄。年初賀歲電影《毒舌大狀》被網民推測疑似影射1999年女模彭楚盈白骨案，現實中翁靜晶正是當年彭家的代表律師，有份代表彭家提出死因庭研訊。翁靜晶將案件分成三集作分享，日前上架新片，談到死者彭楚盈被發現時身首異處，頭顱更跌入床邊的垃圾桶內，而翁靜晶更指當時彭楚盈頭顱下有一個曾被使用的避孕套：「嗰個避孕套……咁重要嘅證物都可以話……警察就話唔知去咗邊，當時根據紀錄，警察拎咗個避孕套去化驗所，去驗DNA嘅。嗰個送避孕套（去化驗所）嘅警察誓神劈願話有送去，但化驗所啲人又誓神劈願話冇收過，咁可以點？一個死都話畀咗，一個死都話冇收到，都冇辦法，呢啲嘢老實講，有一邊要講大話，公權力講大話，政府講大話你可以點算呀？咁個避孕套就冇DNA證據，最重要嘅嘢嚟㗎噃！」

翁靜晶：彭楚盈曾報警話被強姦

翁靜晶表示彭楚盈白骨案更涉其他案件，但卻完全沒有紀錄，翁靜晶表示：「彭楚盈1991年到1993年期間，有報過案話畀人強姦嘅，亦有話畀佢男朋友打呢啲嘢嘅，但呢啲口供所有嘅嘢呢我哋都冇辦法搵到㗎喎！好多我哋想要嘅資料呢……1995年距離呢單案都有一段時間啦，由於我哋唔係被告人身份，被告人就可以要求拎好多嘢睇嘅，因為係被告人要證明自己清白，可以申請嘅。但呢個案件，我哋只係代表死者家屬，佢就唔畀你囉。」

【點擊睇更多翁靜晶舊照】：

翁靜晶：彭楚盈16歲識方曼生

翁靜晶指發現彭楚盈遺體的單位非常凌亂，但據她了解，認識彭楚盈的人都指彭楚盈是非常整潔的人。翁靜晶又分享聲稱跟彭楚盈只是業主與租客關係的陳方安生胞兄、律師方曼生其實認識最少十年，翁靜晶指彭楚盈16歲已認識方曼生：「16歲佢已經搬咗出嚟，唔喺屋企住喇！起初同朋友喺灣仔同住，後來方曼生帶咗佢去炮台山畀咗個地方佢住，間屋好靚仲可以養狗仔兼有工人添，後來又由炮台山搬去灣仔帝城大廈，嗰個單位仲係買嘅，方曼生有出錢買個單位畀彭楚盈。後來個單位賣咗，賺到錢佢都有畀返錢個男朋友……畀返方曼生嘅。91年方曼生有單官司，清水灣有間別墅，個業主話本來有160萬支票畀方曼生嘅，彈咗票，方曼生認為對方欠他錢，不過別墅同時又已抵押給銀行，銀行指業主去咗加拿大搵唔到人，銀行要收樓，方曼生走出嚟話層樓佢有權益『佢爭我錢』，最後變成方曼生同銀行打官司，佢將彭楚盈擺咗喺呢間屋度住，彭楚盈賣咗帝城大廈就去咗呢度（清水灣別墅）住。」

翁靜晶稱彭楚盈家中離奇變凌亂

翁靜晶指當時彭楚盈在北角開設寵物店做老闆娘，「間寵物店同方曼生一齊有營運嘅，有錢有入息嘅。後來93、94年方曼生輸咗單官司，銀行就攞咗層樓喇，佢叫彭楚盈搬，先去咗華德大廈（發現死者單位）。咁點解有華德大廈呢，因為方曼生間律師樓就幫呢個華德大廈原本個業主嗰兩夫婦買入嘅，因為做錯嘢費事畀個客告，又唔係貴，個律師幫佢買咗。咁佢買咗呢個單位畀彭楚盈搬入去住，咁多年都有工人，但去到93年佢哋感情唔好，其實當時彭楚盈媽媽都不時去探個女，93年方曼生同彭楚盈感情有問題，彭楚盈成日埋怨方曼生比較少去理佢，工人都冇請，後來係媽媽幫佢手執嘢。」不過翁靜晶指很多認識彭楚盈的人都指，彭楚盈家中很整潔很美，而且很珍惜與方曼生一同購入的擺設品，但離奇的是警方到場後表示當時現場十分凌亂。

彭楚盈家中多樣物件遺失

翁靜晶與其徒弟於片中表示，彭楚盈生前有本日記，內裡有「曼生」及疑似與方曼生相關出入數紀錄的字眼，而彭楚盈家人亦曾見過，但警方尋回同一本日記時，當中的關鍵頁數被撕走。另外，翁靜晶與其徒弟稱彭楚盈生前有隻手錶，背後刻有方曼生的字眼，該手錶亦遺失，此外包括印有二人樣子的瓷相亦遺失。

翁靜晶用放大鏡睇相被《毒舌大狀》參考？

翁靜晶召開記者會後成功令政府決定召開死因庭，但要求申請各樣相關證物都被阻撓，翁靜晶最後要求看發現死者現場環境相片，翁靜晶得到逾300張3R相片，她用放大鏡仔細觀察，他們指這一幕更疑似被《毒舌大狀》採用，翁靜晶表示：「我攞咗我阿婆個放大鏡嚟試試，原來床邊有封信，放大啲睇吓原來係稅局，再睇下其他相，原來有銀行保險箱嚟攞收費，咁就睇到好多嘢。你話佢冇錢，點解稅局追佢龐大稅金呀？原來佢個人畀人借人頭嚟炒樓。話到佢咁窮，都唔係嘅。佢屋企人都有話到拎返遺物嗰陣，入面有好大疊銀行帳簿……戶口簿，十幾本，警察同家屬講唔使再去銀行問，已經幫佢哋問晒，入面冇晒錢，銀行戶口清零，咁人哋再查關你咩事，點解要叫人唔好查呢？」翁靜晶更指彭楚盈家屬曾指被一名警員提醒不再向傳媒透露太多細節，指收到消息彭楚盈生前曾欠債十萬元，怕彭楚盈家屬太高調而被追債。