邵子風追數風波澄清不關呂方事社交網疑被盜暗指一人所為

更新時間：16:30 2023-10-08
發佈時間：16:30 2023-10-08

現年59歲的呂方與經營食品生意、有「網絡買餸天后」之稱的圈外女友伍惠寶（Rainbow）於2020年結婚，二人育有一女Emma。呂方太太伍惠寶日前被邵子風在網上公開追數70萬元，繼伍惠寶在邵子風的社交網否認欠款，疑是伍弟的網民「Kelvin」，又發聲撐家姐，網民日日食花生。邵子風昨日（7日）再出帖文，解釋清楚與呂方無關：「請大家搞清楚，我從來無講過大明星呃我，只係大明星娶左（咗）個老千啫！」

【相關閱讀】：呂方太太遭邵子風公開追數70萬爆罵戰伍惠寶否認欠款：多年嚟你對我騷擾

【點擊睇邵子風與呂方太太風波新發展】：

邵子風又為自己被伍惠寶指控曠工澄清：「最好笑話我唔番（返）工，6個月有4個月唔見人…我勤力到出晒名！出心出力都未夠，仲出埋錢！我又駛（使）唔駛（使）搵個舊同事出嚟證明我有番（返）工？另外，各位上流社會嘅闊太太，假如此女已進入你們的朋友圈，敬請小心。他（她）早早就已經部署，用大明星太太的身份，擠（躋）身上流社會圈子，目的為何？你話呢？佢搵你同你傾過乜咪就係乜囉！」邵子風又指自己的社交網被盜：「有人想hack我個facebook…如果我呢排有乜事發生，大家知道要去搵邊個啦！」

邵子風揭爆料原因

另外，邵子風又回應有網民要求他證明自己是好人：「有人叫我攞證據出嚟證明自己係一個好人…原來香港而家已經變成咁…原來你所謂嘅區區幾十萬俾人拖欠，我出聲仲要俾人X！可能對你嚟講幾十萬係散紙啦…啱嘅，人地用自己本事呃我，我輸我抵死，無問題呀！我又無認輸，點解你激動過我嘅？」有網民安慰邵子風：「我自己覺得你可能都知道追唔番，而家純粹為啖氣」，邵子風認為只是講出件事：「老千最怕有人大聲話自己係老千，因為老千無時無刻都響度搭緊人上船！如果有人大聲指出，傳媒報道夠廣，就會令老千再難落手！老千所染指的不同上流朋友圈，自然會將其排擠。希望我寫到咁清楚大家會明白。『為啖氣』好正常，但層次低」。