星8卦｜「嬌嬌女」同「世家」離婚外父周圍唱女婿「唔得」令人側目

更新時間：11:00 2023-10-20
發佈時間：11:00 2023-10-20

呢個世界真係有啲咁嘅老竇，成日叫個女離婚，離婚之後又猛咁唱前女婿，認真極品。「嬌嬌女」各種條件都不俗，加上有個「出名」老竇，都叫見過下世面。「出名」最唔想阿女同圈中人拍拖，但偏偏自己就係靠呢行搵食。

知道阿女同「才子」一齊，嫌男方有啲壞習慣，用盡方法捧打鴛鴦，「嬌嬌女」為呢件事同「出名」嘈咗幾次大交，但最後都係基於一家人唔可以點樣。之後同「世家」拍拖，「出名」唔再阻撓，因為同自己喺背後策劃有關，兩個人好快結婚，「出名」即刻送上厚禮，驚對方唔要自己個女。實情係貪人哋個門口大，想借「世家」老竇勢力幫自己建立關係，搵更多嘅錢。

唔知點解兩個後生仔結婚唔夠半年就好似貼錯門神，「出名」一定要阿女講原因，原來係「世家」完全盡唔到老公嘅責任，只怪自己婚前無真係面對呢個問題，仲要成日俾兩邊父母催生仔，後嚟仲知道「世家」喺出面有妹妹仔，又唔似得同自己喺床上嘅表現，似乎問題喺自己身上，於是果斷離婚。「出名」梗係唔想，但阿女堅持，無面之餘惟有周圍話前女婿喺床度唔得至要離婚，大家聽到只有一個反應：「唔係啩，你咁缺德，點做長輩呀！」