獨家丨朱咪咪樂做蠢女人避網騙:我唔識上網 快閃回港賺零用錢拒認「億萬富婆」
發佈時間：07:00 2023-10-25
虛擬資產交易平台JPEX詐騙案，多位藝人肥媽、林作及莊鍶敏等捲入其中。早前低調回港，71歲被封「億萬富婆」嘅朱咪咪自言落後，唔知乜嘢係虛擬貨幣，一向抱住唔識唔知就唔好掂嘅心態，避過一切詐騙陷阱，她重點提醒，「最緊要唔好貪心」，更溫提老人家唔好怕被笑落後，自言out爆唔識上網，但生活仍然過得很好。採訪：方騫平
近年咪咪姐陪兩子及兒媳長居新加坡，留低老公馬生(馬德鐘堂兄)在港搵食。近月咪咪姐低調返港幾天，為一間合作多年的老字號金舖舉行的周年晚宴助陣唱歌，又趁空檔到老人院獻唱做義工。
罕唱酒樓帶起高潮
雖然「降呢」在酒樓演出，但咪咪姐依然敬業樂業，投入地享受小舞台，壓軸演唱《千個太陽》、《相識也是緣份》、《禪院鐘聲》，咪咪姐更貫徹鬼馬風格，提示觀眾要配合《千個太陽》嘅歌詞，齊呼「好」及「正」，唔少觀眾用手機邊影邊和唱，台上台下打成一片，掀起全晚高潮，好熱鬧。提到早年曾經教路，提點張敬軒走埠登台時一定要「一閃遮三醜」，可是她當晚衣著卻相當樸素。對此，咪咪姐笑說：「佢唱大台(舞台)嘛！而且我呢啲年紀閃唔起。」
澄清變瘦因少澱粉
講到闊別紅館舞台6年多，咪咪姐坦言一直有人招手，原本去年9月有計劃在紅館開騷，卻險被朋友「賣豬仔」，因而放棄檔期：「都唔知有幾多人叫我唱紅館呀，但我𠵱家都冇乜出嚟，又唔等錢使都唔恨做，之前做過9場啦，最怕有壓力會好辛苦，加上休息得耐個人變懶，其實連「橋」都有埋，心思思時再算啦。」享緊清福的咪咪姐生活舒泰，她澄清唔係傳說中因病及減肥而變瘦：「黐線！只係因為冇飯食，因為同囝囝住，佢哋唔食飯，冇澱粉質。𠵱家每朝我開車出去食碗湯粉，買啲日用品，傍晚求其食啲餃子及菜，煮完狗飯就帶狗喺屋企附近散步，生活得不知幾開心。」
太辛苦唔返TVB拍劇
對於被封「億萬富婆」，咪咪姐斬釘截鐵話唔講錢！但承認分別喺星、馬及香港有物業，在大馬更有鋪位。問到可有投資虛擬貨幣？她即耍手擰頭：「唔知乜嘢叫虛擬貨幣，完全唔識，只識得唱歌，其實做蠢女人係福氣。」能夠不愁生活做闊太，咪咪姐的致富之道一字咁淺，就係慳：「要積少成多，出糧就放入銀行，有積蓄就投資買磚頭，當年好好彩，蓄到2至3萬就可以做首期，近年因為長時間不在港，九龍區物業連車位都放咗租。」
朱咪咪強調從少女時期開始唱酒廊，對物質冇乜要求，不會穿金帶銀，她又指自己不及69歲肥媽咁叻識得上網。問到可曾遇過呃錢黨？咪咪姐即坦承：「我唔懂財經，任何投資都唔識，對數字遊戲好蠢，但細佬做股票，佢會幫我落閘，最重要我唔會為賺錢而心雄，因為貪字得個貧，緊記唔識嘅嘢唔好掂。」正因唔等錢使，咪咪姐跟TVB仍有藝員約都無意返去拍劇：「TVB有搵我拍劇，我答唔使客氣喇！真係前世未辛苦過咩，捱更抵夜唔係老人家做，而且留喺香港兩個月，做綜藝還可以。」
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
