前港姐唐麗球女兒激罕曝光！父系基因強大撞樣莊子璇 曾留學加拿大韓國
發佈時間：10:00 2023-10-27
現年59歲、1984年港姐季軍唐麗球（波波）與吳毅將婚後育有一女吳梓希（Janelle），專心相夫教女的唐麗球即使脫離幕前工作，但依然保養得宜，早前她接受好友鍾慧冰的訪問，當年廣告模特兒出身的唐麗球，參選港姐而加入了TVB後，發生了一件事，令她印象難忘！唐麗球亦罕有地提及女兒吳梓希，自爆向女兒傳授愛情心得。
【相關閱讀】：58歲唐麗球晒纖幼長腿網民激讚有少女味 陪吳毅將食茶記夠貼地
【點擊睇唐麗球近照】：
同樣是港姐季軍的唐麗球與鍾慧冰，私底下老友鬼鬼，難得兩人有機會坐埋一齊傾偈，當然一輪咀「講唔停」，鍾慧冰讚唐麗球不單樣子沒有變，連性格亦沒有變，唐麗球笑說：「呢個心態係幾好好多，以前我成日都唔明乜嘢係糊塗是福，但其實你回想幾十年，諗深一層，仲乜要咁清醒？」重提當年選美原因，唐麗球直言是響往香港小姐的光環：「嗰陣都有諗過想入娛樂圈，但係我係預咗會輸，只係諗住去襯，反而又未玩過，咪去試吓，我真好冇大志，真係抵我贏！高麗虹真係好靚，我係輸硬，一睇已經覺得佢係冠軍。」
唐麗球入行後收入大跌
不過唐麗球入行前做廣告模特兒，當時收入好好：「本來我係想行catwalk，但係唔夠高，之後去拍廣告，一個job最少要拍4個鐘有2000幾蚊，喺80年代已經係好好，可以供自己讀書，我仲試過同張國榮拍廣告，成班年青係好好玩，跟住咪叫我參加港姐，但係入咗TVB，做咗港姐就慘，因為冇錢，一個月先得嗰2000蚊，又冇乜騷做，就算連剪綵都冇錢。」唐麗球忍不住分享了一個笑話：「我哋以前香港小姐成日要剪綵，冠亞季成都一齊去，屋企收藏咗好多金鉸剪，你知做呢行真係冇錢，好窮，下下又要的士，當年仲同兩個女仔一齊租地方住，仲要住廣播道，但係大家都搵唔到錢，佢哋咪提議我拎啲金鉸剪當咗佢，於是咪去佐敦道啲金舖換咗佢，拎咗三把，點知原來三把都係假，我仲以為係真，因為把鉸剪拎上手係有重埋，嗰陣真係好尷尬，但係真好好笑。」
鍾慧冰亦大爆唐麗球鍾意靚仔？不過她否認並說：「我諗冇人唔鍾意靚仔，但其實我都算唔係，我係睇個感覺，同一個人有冇feel，第一眼係好緊要。當年有個男仔第一眼係冇FELL，但係啲人話佢好好好，咪走去嘗試，了解咗先，但原來唔鍾意就係唔鍾意。好似以前我成日好響往同男朋友行沙灘漫步，好浪漫，終於有一次佢同我去沙灘漫步，點知去到我覺得啲沙好污糟，個天又黑，咪叫佢快啲走，原來當一個唔係你想要嘅人，同你去做啲一啲幻想好浪漫嘅嘢，個感覺係唔係一樣，跟住咪同佢講，唔好意思，拍極拖都冇feel。」
唐麗球向女兒傳授愛情心得
唐麗球還說：「我每次拍拖都想結婚，係想將來，可能因為咁所以成日惹俾人撇，因為有壓力嘛，分手嗰陣對方都會話『因為你太好，唔想傷害你，你應該值得有一個比我更加好嘅人』。」鍾慧冰問她有否女將自己的心得有教女，唐麗球說：「我有教佢千祈唔好畀對方知你有幾愛佢，男人呢，如果俾佢覺得佢對你係好重要，佢咪唔會care你囉。」不經不覺，唐麗球的女兒已經20歲，早年與老公更女兒送往加拿大和韓國讀書，唐麗球甚少讓女兒的樣子曝光，直到近年才將母女合照放在社交平台，女兒吳梓希的外貌偏向似爹哋，更有幾分似應屆港姐冠軍莊子璇。
【其他文章】：
吳毅將內地登台發惡片網上瘋傳 網民嚇窒嗌報警：壞到我都想打他
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
