星8卦｜「家姐」賣樓倒貼嫁「老粗」望夫成龍欠落一身債

更新時間：11:00 2023-10-31
發佈時間：11:00 2023-10-31

唔知係咪到咁上下年紀，女人就特別想嫁？好似「家姐」同「倒及」呢對金蘭姊妹，因為兩個都拍過啲肉感戲，知道自己好難搵到好人家，於是一齊跟大師日拜夜拜，希望搵到好老公。幾乎喺同一時間兩姊妹都搵到，「倒及」嗰位白手興家，平平實實，娶咗佢之後生意蒸蒸日上。

「家姐」呢位門面好好睇，遠嫁外國，大家梗係唔知咁多底蘊，其實佢個男人根本無錢，但見姊妹都有着落，呢個「老粗」之前一直係追開女明星，最重要唔嫌自己嘅出身，畢竟當年為生活都博到好盡。「家姐」賣晒香港家當帶住近9位數嘅身家，希望喺嗰邊幫老公創業。「老粗」有乜所謂啫，之前追嗰啲到咁上下就知佢乜料自動行開，見有人唔識死，仲帶埋錢嚟嫁，即刻帶佢返家鄉威威。

「家姐」頭幾年真係好威猛，買靚屋搞大生意，仲定時叫媒體報道，但「老粗」根本成唔到大器，最終將佢副身家清袋不特止，仲黑仔到有個項目爛尾，搞到而家孭住一身債，「老粗」都有埋怨「家姐」，太想出名爭氣，又唔計吓自己係普通人，搞投資一定唔夠商人陰險，呢筆債之大，連「倒及」都唔肯再借錢畀佢哋，如果真係破產，「家姐」一定頂唔順！