獨家丨吳若希想做諧星視麥美恩為勁敵 自知冇身材首做台慶劇女一賣搞笑
更新時間：07:00 2023-10-30
發佈時間：07:00 2023-10-30
發佈時間：07:00 2023-10-30
字體大小
吳若希(Jinny)於TVB台慶劇《香港人在北京》中以誇張手法演繹投資失敗嘅跟得老婆Helen，跟陳展鵬搞笑互動，觀眾好鍾意係咁畀Like。入行13年的Jinny曾跟菊梓喬為爭做「星夢一姐」惡鬥多年，𠵱家菊梓喬事業滯後；Jinny既有幸福家庭又重新上位做女主角，從來都話鬥長命，Jinny風騷坦言傻人有傻福，好彩多過努力。採訪：方騫平 攝影：錢文坤
劇中吳若希充份發揮喜感，有唔少笑位。原來Jinny喺周星馳及苑瓊丹身上偷師：「陀B時訓唔著最鍾意翻煲周星馳嘅《算死草》、《九品芝麻官》…尤其鍾意睇星爺同苑瓊丹對鬧場口，苑瓊丹可以一輪嘴講對白，好犀利。」
劇中吳若希有唔少笑位。
劇中跟戴祖儀合組「姑嫂合唱團」。
陳展鵬跟吳若希有默契。
Jinny喺周星馳及苑瓊丹身上偷師
爆老公鍾意平胸
Jinny靠搞笑演出爭一席位：「我唔敢渴求做苑瓊丹接班人，暫時我做諧星嘅最大勁敵係好姊妹麥美恩，佢轉數好快；我勝在夠蠢成日鬧笑話俾人笑，而且擁有佢冇嘅長腿。」劇中Jinny着吊帶背心睡裙晒長腿「生擒」老公陳展鵬，見她身材欠奉！她笑說：「現實中我老公何兆鴻就係鍾意我咁(平胸)，我隆胸佢唔會Like，而且佢都排骨咁有乜資格嫌棄我。」
Jinny對於首做女一零壓力，因為演員「人腳」好，對手能帶住她演出，角色又似做返自己，最開心可以跟兒時偶像梁漢文(Edmond)及盧慶輝合作，31歲的她更自爆童年回憶，讀小六時上網下載 Edmond嘅《七友》；2001年又晚晚追睇《封神榜》，見盧慶輝飾演嘅「伯邑考」被「妲己」溫碧霞殺害，再搓成兔肉丸獻畀紂王就好驚：「我知佢𠵱家在生好安全，經已好安心喇。」另外，Jinny承認自己好運，就算點任性，突然要結婚生仔都繼續有機會，強調從冇執著做「星夢一姐」，反而enjoy目前擁有嘅嘢。
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
