孫慧雪宣布離巢TVB！直認早有其他電視台招手親解《愛回家》與KC歐瑞偉發展

更新時間：17:47 2023-10-31
發佈時間：17:47 2023-10-31

現年41歲的孫慧雪與富二代男羅天彥（Edwin Lo）結婚後誕下大仔「水哥」羅駿滐（Riley），到了今年7月再度榮升媽咪，誕下細仔「肉肉哥」Rian。當她宣布再次懷孕時，不少觀眾都擔心她在處境劇《愛．回家之開心速遞》中的戲份，會隨住待產而要離開劇組，誰知孫慧雪今日（31日）宣布已正式約滿效力18年的TVB，決定離巢。

【點擊睇更多孫慧雪宣布離巢】：

孫慧雪在IG發長文承認離開TVB，她指出大學畢業後的第一份工就成為演員，一做就18年，「喺度我學咗好多嘢，遇到好多人生導師，認識到好多知己好友，亦令到觀眾認識我，所以我非常感恩！不過人生就好似一班列車，走向唔同嘅旅程，就算幾唔捨得，呢一站，都要講再見啦！」孫慧雪又感謝每一位台前幕後的照顧，同時亦道出這多年來捱更抵夜的辛酸：「由擔演死屍、替身、路人丙、禮物小姐一步一步到主持、有連戲角色，慶幸有大家望住我一路成長，接下來，希望大家仍然繼續支持我呢位小小薯，繼續追夢，仍然樂意陪伴我迎接未來不同挑戰，見證我一路成長，感恩沿途有您🙏🏻」！

孫慧雪今日回覆《星島頭條》，近年孫慧雪應憑《愛．回家之開心速遞》飾演名媛朱茜（Rachel）一角而深受歡迎，談到角色今後的安排，她說：「我都唔捨得Rachel呢個角色，但係不知不覺完約，都冇辦法，而家監製會睇吓點樣處理。」問到將來的安排，孫慧雪又說：「喺我未完約嘅時候，都有其他電視台嘅工作搵我，但係因為未完約而做唔到，雖然細嗰個仔啱啱出世，我都要照顧佢，不過我手頭上都仲有啲工作，睇吓跟住會唔會有其他工作邀請，我自己都好期待有新嘅挑戰，始終喺呢行18年，仲有做演員嘅夢想，所以唔會輕易放棄。」

【點擊睇《愛．回家》「KC」又失戀】：

畢業於城市大學語文系的孫慧雪當年一邊讀書一邊做記者，又曾兼職做模特兒，之後投考無綫電視第20期藝員訓練班，甫畢業便擔任綜藝節目《美女廚房》助手「飯」。孫慧雪演過很多不同劇集，但戲份不算多，且因初出道時經常演死屍，獲封專業戶被暱稱作「屍雪」。孫慧雪直至2016年才成為女配角，不過同年結婚並產子後，又多以客串為主，到2021年演《愛．回家》的「朱茜」，飾演「KC」歐瑞偉女友，才有較多發揮。