69歲肥媽談閨房事斥女人無性需要等同失敗自揭小鳥依人激發丈夫保護慾

即時娛樂

更新時間：18:00 2023-11-04
發佈時間：18:00 2023-11-04

現年69歲的肥媽（Maria Cordero）經常在YouTube頻道分享生活點滴，一向語出驚人的她最近拍片分享夫妻相處之道，日前上載一集更大談閨房事，掀起網民熱烈討論。

【相關閱讀】：69歲肥媽坐輪椅現身機場照片網上瘋傳陸浩明10個字留言為「阿媽」送祝福

【點擊睇肥媽講性生活】：

片中，被問到良好婚姻生活與良好性生活有否關係？肥媽坦言有絕大關係，亦表明不贊成讓小孩睡在兩公婆中間。對於許多女性認為日頭返工夜晚湊仔，還要滿足老公需要實在難以平衡，肥媽直斥：「呢個唔淨係老公，如果你唔需要（性生活），你就係一個失敗嘅女人！你冇可能唔需要㗎，你唔需要就已經係失敗婚姻，因為你一定要平衡，你擺低個細路囉，你畀朋友，邊個都好，你兩公婆一定要有自己時間，幾廿歲都好可以拖吓手、拍吓拖，係你放棄咋嘛，係你將自己變成一個生仔、煮飯機器，係你自己做出嚟。」並強調夫妻性生活是非常重要。

肥媽續指，婚姻應是雙方付出，最緊要溝通：「你同自己愛嘅人都唔可以細細聲講嘢，一定要大聲㗎咩？男人係好唔鍾意你喺人哋面前數佢，你都唔鍾意啦……講嘢係藝術，你要個麻甩佬對你溫柔，但你對佢又似潑婦，咁點溫柔呢？男人又係，氹女嘅時候咁叻，你老婆就係𡃁妹嚟咋嘛，氹老婆同氹女一樣，咁就得㗎喇。（結婚後變老公老婆，唔係情人喎！）No！係你自己將佢變㗎啫，到我老公死嗰日，我都係佢心目中嘅小女人嚟嘅，佢臨死都叫人睇住我，話我唔識睇馬路。」她認為，在老公面前應做小女人，以滿足對方的保護慾：「人生如演戲，演得一套好戲你就有好生活，咁點解唔演啫。」

【點擊睇肥媽大膽言論】：

肥媽曾有過兩段婚姻，18歲時與年長22載的琴師結婚，育有6名子女，其中4名是男方與前妻所生，惜婚後一年老公失業，自此她獨力養活一家八口，最終因遭受家暴，加上對方與女傭珠胎暗結，二人於1989年離婚。直到1999年，肥媽與任職工程師的施曉洋（Silva Ricardo Manoel）結婚，二人先後舉行三次婚禮，並有17名孫兒，惜丈夫於2020年11月病逝，至今她仍一直保持單身。