獨家丨寶珮如爆《白日》精彩刪剪劇情同「院長」有路 無奈被Cut戲難忘喊住獻身
發佈時間:07:00 2023-11-16 HKT
獲金馬獎5項提名的《白日之下》上映兩周票房收近500萬,觀眾大讚戲中所有演員演技出色,包括59歲飾演惡毒看護的寶珮如(Baby)。她接受《頭條日報》專訪時首公開刪剪劇情,她飾演的「芳姐」原來跟林保怡演的「章院長」有段情,做事麻木不仁全為院長,被刪戲份相當精彩,Baby言談間好無奈但明白導演用意。同時又開心提到,買生果遇到《白日》粉,仲用佢嘅戲中對白回應返佢,𠱁得Baby好開心。採訪:杜杜 攝影:羅安強 場地:Studio Meta
因母親患有認知障礙症,Baby因工作關係要安排媽媽住護老院,所以好了解看護工作情況,「係好煩厭嘅工作,點解要綁住老人家?方便佢哋做嘢快啲,我媽媽都被綁過,因為佢周圍走驚走失。」當《白日》監製爾冬陞親自搵她演「芳姐」時,她睇劇本已覺得角色好有發揮,更驚爆同保怡的非一般關係,「做衰人,但內心唔係咁差,係為咗愛,呢個看護同保怡有段情,其實我係為佢。」
開心對白觀眾入晒腦
原來「芳姐」麻木不仁,全為了院長「章劍華」,在刪剪戲份中,Baby跟飾演看護「何姑娘」的龔慈恩有場對手戲,「龔姐叫我『你唔好再為呢個男人做嘢啦』,我同佢講『我唔需要呢個男人為我報恩,我係甘心情願為佢』。」Baby跟保怡的感情戲被完全刪剪,當中最令Baby難忘的場口,是跟保怡的爆喊獻身戲,「我想佢開心,獻身畀佢發洩,佢推開我趕我走。」被拒後的「芳姐」喊住質問 「院長」,為何要「小鈴」(智障院友)都不要她,「我話『我為你做咗咁多嘢,由邊度開始跟到你嚟呢間安老院』,嗰段戲我好鍾意,一路喊住講。」
![「芳姐」跟「院長」本來有感情戲,好想睇呀。 「芳姐」跟「院長」本來有感情戲,好想睇呀。](https://image.hkhl.hk/f/1024p0/0x0/lr/sthl/86849d855a21006cda6e4a92b0f3792b/2023-11/359366825_730817312387174_3638374667273984356_n_0.jpg)
![Baby在《白日》虐待周漢寧,直接用釘書機釘落手,原來有豬皮包住。 Baby在《白日》虐待周漢寧,直接用釘書機釘落手,原來有豬皮包住。](https://image.hkhl.hk/f/1024p0/0x0/lr/sthl/bf90e3603cb32516bfa39d8dc77b9989/2023-11/01_2_3.jpg)
喜愛戲份被刪剪,Baby好無奈,但亦理解導演用意,「人生就係好矛盾,我有諗返呢段戲,如果有埋大家會覺得我未必咁衰,唔會focus喺射水、打人嗰啲情景,cut咗就會focus返,全套戲喺安老院發生,唔要有支線,淨係見到個惡姑娘、衰嘅姑娘。」雖然戲份不多,Baby演出仍獲激讚,上映3日去買生果已有驚喜,「我揀緊車厘子,問後生老闆,盒底嗰啲唔知靚唔靚?佢就望住我話『一係食一係唔食』,佢講句對白因為認到我,幾得意佢入咗腦,原來佢同幾個sales都睇咗,話『你做得好正呀!寶小姐』,呢個係第一個親自收到嘅反應。」
![「芳姐」對院友態度惡劣,在天台向着他們射水一幕最震憾。 「芳姐」對院友態度惡劣,在天台向着他們射水一幕最震憾。](https://image.hkhl.hk/f/1024p0/0x0/lr/sthl/2617e4103852c6e773b3ff11de591a76/2023-11/Fnrp9auGOTKtkzdkidayz3ZYiC-hy_QZrafVma2n1Zk.jpg)
![繼《藍天白雲》後,Baby再跟梁雍婷合作,大讚她夠專業。 繼《藍天白雲》後,Baby再跟梁雍婷合作,大讚她夠專業。](https://image.hkhl.hk/f/1024p0/0x0/lr/sthl/701829ff0eb1e3c2d4aac1c9f0c22a91/2023-11/09_0_6.jpg)
向林保怡搲撈再合作
除了獲讚,能跟欣賞已久的林保怡首合作,亦令Baby好享受,「對戲時佢攞咗我個劇本掉開,佢話『唔好睇,唔好限住嗰樣嘢』我即刻窒一窒,以為佢好惡,對完戲佢話『我哋猜枚,你飲唔飲酒㗎?玩吓囉』佢諗到我緊張,想我放鬆,我真係同佢猜枚,好聽話,融合咗『芳姐』對佢嘅愛,佢要乜我提供乜,佢幫到我。」由於合作太過愉快,Baby更鮮有主動搲撈,「我知佢有做導演、監製、寫劇本,我自薦話『好想再同你拍,你有咩啱一定要搵我』」
![1999年一場車禍,令Baby嚴重毁容,人生出現大逆轉。 1999年一場車禍,令Baby嚴重毁容,人生出現大逆轉。](https://image.hkhl.hk/f/1024p0/0x0/lr/sthl/203c54eae5a858cda90cc5d69f0802c7/2023-11/babybohkartist_240827656_1231906380554834_7284920095180528241_n_600_1024.jpg)
訪問當日是11月11日,正值Baby發生嚴重車禍24周年,「以前我好驕傲,因為太細個好容易得到一啲嘢,入行有個好好嘅經理人周梁淑怡,冇讀過訓練班就做主角,同好多大星做節目,冇做過路人甲乙丙,完全冇捱過,就係一個車禍,所有嘢停晒、冇晒,反思以前有嘢食都話唔食要減肥,嗰時真係好衰格,所以我冇撞車,可能停留喺嗰個階段。」Baby認為現在的出色演技,全靠這些經歷提供養份,「早幾日食慰勞宴,見到爾生(爾冬陞),譚玉瑛姐姐坐我隔籬,佢問我哋兩個,唔係話我哋老,佢問『係咪上咗年紀,個戲越嚟越好』,我答佢『唔係戲越嚟越好,係我哋人生經驗豐富咗』。」
![1988年入行不久的Baby,已有機會跟林建明合作主持節目。 1988年入行不久的Baby,已有機會跟林建明合作主持節目。](https://image.hkhl.hk/f/1024p0/0x0/lr/sthl/d202c4c21f16e26c78e1e2d524881a2b/2023-11/19_0_4.jpg)
![Baby跟譚玉瑛出席電影慰勞宴,被爾冬陞問年齡跟演技關係。 Baby跟譚玉瑛出席電影慰勞宴,被爾冬陞問年齡跟演技關係。](https://image.hkhl.hk/f/1024p0/0x0/lr/sthl/55681f00ae2a965c9edcd51062424099/2023-11/399836442_801810845289903_9204964883113760457_n.jpg)
對於會否繼《藍天白雲》後,再有電影獎項提名,Baby完全冇信心,「呢個戲個個都咁好,佢哋實至名歸,我仲未行到嗰步,已經好感恩做咁惡死嘅看護,被人認同我做到惡女人,已經攞咗獎啦!」明年便登六的Baby,不但不言休,還希望繼續有進步,「好想演『老雞』(老妓女)、企街嗰啲,我未演過,呢啲戲好難演,我又好想演吸毒者,鼻涕口水流嗰啲,可能人生經驗複雜咗,想演啲複雜啲嘅戲。」
![2018年,Baby首度憑電影《藍天白雲》獲提名金像獎最佳女配角。 2018年,Baby首度憑電影《藍天白雲》獲提名金像獎最佳女配角。](https://image.hkhl.hk/f/1024p0/0x0/lr/sthl/45c3b6c7a336f00fa54e1a563b7cadd3/2023-11/Pu0IuPe8VsBGAXHFiKkGnRnh2zNcIfosdDAeK3QwHis.jpg)
《星島頭條》新網站有更多精彩內容:http://www.stheadline.com/