張致恒網上推銷情趣用品爆罵戰稱無錢開飯反遭前粉絲控訴扮可憐多次借錢

更新時間：21:30 2023-11-21
發佈時間：21:30 2023-11-21

現年39歲的張致恒（Steven）與粉絲區燕雯（雯雯）2019年奉子成婚，二人更四年抱四，女方多度呻窮兼頻鬧離婚，又公開炮轟老公張致恒又懶又廢，被網民封為「離婚界KOL」。張致恒終於落力工作，不過就為情趣用品店打工，除在網上宣傳叫網民去參觀外，又多次推銷情趣用品，引起網民討論，張致恒更因為網民的一些問題感到不滿，爆發罵戰。

【相關閱讀】：雯雯「你問我答」霸氣親解鬧離婚仍造人張致恒否認性上癮被問偷食原因

【點擊睇張致恒與網民爆罵戰】：

張致恒近日在社交網出Post，拎起情趣用品推銷：「喂，聖誕節話咁快就就嚟到啦，有冇諗好有啲咩禮物送俾朋友呢？冇嘅話……今期最新推介……其實大家都係普通人都係需要放鬆，所以如果大家有咩需要可以上嚟舖頭搵我，我一定會幫你搵到最好嘅解決方法！」有不少網民對張致恒打工表示支持：「加油，支持你，都系（係）一份工，呢家咩年代，我覺得靠雙手搵食既（嘅）人都值得被尊重的」、「放過佢啦，人哋都係搵食遮（啫）！就算佢唔做，一樣會有其他人做」、「賣情趣用品都係一份正當工作，有啲人真係有色眼鏡睇人」等。

張致恒反問犯法咩？

不過有多位網民認為張致恒作為公眾人物，接工作時應該要注意：「OMG，我睇緊啲咩？！公然叫人賣（買）性玩具」，張致恒回應網民：「公然？乜我做緊犯法咩？」，有網民則認為會影響到小朋友：「只不過身為一個公眾人物，做呢啲推銷，有無諗過會影響小朋友？」張致恒嬲爆反擊：「我只係知道我唔做嘅話我連飯都冇得食，有啲顧慮咁多咩？」網民再留言：「所以我選擇唔生，生咗又要好似你咁周圍問人借錢養仔，咁為乜？！仲要生四件」，張致恒為自己辯護：「請問你又知道我經歷緊啲乜嘢咩？其實祝福你三個字唔係咁難打㗎咋，點解做人一定要惡意？講句好聽嘅說話真係咁難咩？」

網民指控扮可憐

另有網民認同張致恒：「其實性玩具推銷並唔可恥，可恥嘅係戴有色眼鏡去睇人同睇物件嘅你！小朋友遇到性問題，每個父母都會經歷嘅，就完全唔關係唔係公眾人物事；另外，你會否或者能否生小朋友，係你自己個人問題同選擇，作為一個非公眾人物，係唔需要在其他人社交平台上發表嘅！」但另一網民爆出錢銀轇轕：「其實講咁多做咩？？你哋直接幫佢買嘢，然後等佢可以直接到達業績就可以啦？！我曾經當呢個人係偶像，但佢連fans都唔放過一次又一次咁問我借錢，原因就係因為老婆要去私家生仔。你問下佢記唔記得我係邊個丫！搞到今時今日咁，係邊個造成？！曾經接濟過佢幾多次，對佢失望過幾多次。你哋會明真心當佢係偶像，對佢好，然後換嚟傷害嗰種感受嘛？！佢有無同粉絲道歉丫！？一句都無丫？依家扮晒可憐」。