伍富橋感動：娶到佢我好幸運 富家老婆出錢出力撐參賽獲網民激讚係賢妻
發佈時間：07:00 2023-11-28
「樂施毅行者2023」已告終，由「奶仔」方紹聰做隊長，夥拍伍富橋 (Alvin)、吳業坤「坤哥」以及一位消防員朋友Ryan組成「Gang Hike」行山隊伍以30小時19分鐘完成100km，比目標8小時慢咗兩小時多。今次團隊後勤膳食及補給品由Alvin富貴老婆梁兆楹（Shirley）負責供應，Shirley貼身照顧老公及隊友，有女網民忍唔住DM Shirley激讚說：「好多人成日話你，其實佢哋好表面，娶妻求淑女，幫夫命係你，唔使理人。」Shirley禮貌回應：「咁靚嘢冇人唔鍾意嘅，不過係凡人又豈能事事如願，個人嘅嘢都係做返好自已本分啫，我應該嘅。」
影住老公伸手入褲浪
今次Shirley除沿途在每個補給站為他們打氣外，一早設計了共11款的愛心暖飯供團隊選擇，包括日式咖喱雞肉漢堡扒飯、日式咖喱雞肉飯、台式雞肉燥飯、鮮茄焗龍脷柳飯、瑞士汁雞肉片飯、牛肉丼、親子丼、白汁海鮮焗飯以及韓式拌飯等，提供飲食叉電，讓他們補充能量。還有汽水、水果茶、生果及熱湯，最爆在荒郊野外，竟然自備爐具滾住胡椒豬肚雞煲及羊腩煲，睇到網民流晒口水忍唔住大讚Alvin家有賢妻。不過，Shirley經常整蠱老公，在IG出Po，影住Alvin伸手入褲浪，寫住：「呢位先生唔該你檢點啲。」好搞笑，Alvin用反眼emoji回應：「你真係po咗出嚟！」
另外，Alvin出po感謝Support Team功不可沒外，特別感謝老婆兩日來不眠不休為她準備所有飯餸及補給物資，仲搵咗埋2-3個老友幫手開車及運送物資上山：「平日我只能食海鮮、魚及雞，避免跑山時出現食物敏感，飲食方面更加要小心，老婆會為我度身設計，如日式咖喱雞肉飯，我當然非常感動，之前單身都有玩過100公里比賽，但同今次分別好大，因為每次Support Team食飯時都會見返自己嘅老婆，而且佢每次都準備晒所有食物及要更換嘅裝備，佢真係好辛苦嘅，出錢出力嚟支持都冇怨言，心入面好感激佢，娶到佢係好幸運。不過佢話作為老婆係應該做，唔覺得係做啲乜，希望大家將重點放返落去團隊及支持樂施會，叫網民唔使特別讚佢，佢特別謙虛，我都想大家關注活動多過我哋兩夫妻，希望大家慷慨解囊，樂力捐輸。」
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
