星8卦｜「浪子」逢女都上買公仔溝掂「女DJ」成笑柄

更新時間：11:30 2023-12-05
發佈時間：11:30 2023-12-05

大家一直唔多明「大婆」點解肯同渣男「浪子」一齊，仲要係咁幫佢做好事，製造好男人形象。「浪子」渣嘅程度簡直世紀無雙，去到邊總會同唔同嘅女人搞上。有次出外景仲俾女主角發現佢偷睇自己換衫，立刻同同組嘅「大佬」投訴，兩個男人幾乎大打出手。因為「大佬」呢幾年收埋咗佢做小三，你裝我條女，肯定死硬！

「浪子」就算拍個節目，都可以同啲臨記搞埋，只要條女清秀又高瘦就可以一齊返屋企開心吓，對女方嚟講，你咁紅睇上自己，仲唔係機會來了？唔落疊就走寶。最經典係溝「女DJ」，每次出門都會打電話報告行蹤，「女DJ」好自然認為自己係唯一一個，覺得男人咁認真對待呢段關係，只不過對方有老婆啫，但人哋咁真心，自己都好珍惜，完全唔認為自己係第三者。而「浪子」好識捉女人心理，知道呢個追求浪漫，所以去到邊都會買個毛公仔送畀佢，而且一個系列咁送，「女DJ」點會唔心動呀，你咁忙仲記得買公仔，仲去搵齊整個系列，次次收到都感動到喊！

對「浪子」嚟講咁樣溝女慳水又慳力，全部叫助手每個站都買定手信方便自己扮深情，當然話自己出去搵，對純情女仔呢招特別入心入肺，「女DJ」咁多年都將呢件事掛喺嘴邊，一來畀人知自己有紅人追，二來又抬舉「浪子」浪漫，其實兩個都唔要面，俾人笑到面黃。