林超榮逝世丨林超榮三女寫信送別爸爸 慨嘆超人爸爸傳奇人生煞青：一切嚟得太急！
發佈時間：14:39 2023-12-13
人稱「超人」的著名編劇林超榮昨日（12日）驚傳病逝，享年61歲。林超榮生前為港台主持電台節目《開心日報》，而今早（13日）播出的《開心日報》製作了「懷念林超榮特輯」，一眾主持分享與林超榮相處的點滴，與林超榮私交甚篤的陳淑蘭，在節目尾聲讀了一封由林超榮三個女兒寫給爸爸的最後一封信，與及點唱了盧冠廷《一生最愛》送別爸爸。
【相關閱讀】：林超榮逝世丨陳淑蘭ICU見超人最後一面 形容進入昏迷狀態偶然眼珠轉動有反應
【點擊睇林超榮生前主持《開心日報》相】：
陳淑蘭讚林超榮三女好乖
港台DJ杜雯惠、陳淑蘭、黃桂林和標爺等人今早（13日）主持《開心日報》，杜雯惠和陳淑蘭全程聲沙沙，憶述與林超榮的相處，多次出現哽咽。林超榮與專欄作家屈穎妍結婚並育有三名女兒，陳淑蘭和杜雯惠在節目上讚林超榮的三個女兒很乖，杜雯惠說：「其實超人好愛佢屋企人，係好錫佢三個女，成日都提起佢哋，我噚日係第一次見到佢哋，好叻，感覺係教得好好，好有禮貌，三個女都好愛爹哋，我睇完嗰封信之後，覺得佢哋係得到超人嘅真傳。」陳淑蘭稱雖然昨日在醫院大家都很傷感，但曾向林超榮的女兒提到將會有一個節目送給她們的爸爸，於是向她們提議，不如選擇一首歌送給爹哋：「佢哋話爸爸有好多歌，不過好老土，我哋返去諗下。」最後她們挑選了《一生所愛》並親手寫了一封信。
「將粗口發揮得淋漓盡致」
陳淑蘭在節目上代林超榮的女兒讀出這一封信，期間多次哽咽，但她依然繼續讀下去：「超人爸爸嘅傳奇人生，昨日煞青咗，我好鍾意亦好唔捨得呢個唔梳頭，得番4隻牙同拎住一個穿窿紙袋，入面袋住三本書，仲係過期未交罰款，同埋將個粗口發揮得淋漓盡致嘅爸爸。爸爸，個個嚟探你嘅朋友都話你真係好好，又搞笑又輪鬼盡，但係乜人都幫，講到幫人，爸爸都有有志不得伸嘅時候。講個秘密俾大家聽，爸爸其實一直都想做區議員，除咗可以幫人之外，仲有個天大契機，就係可以喺區周街免費泊車。」
為林超榮澄清一日沖兩三次涼
陳淑蘭續：「喺《開心日報》報道主持離世咁傷心嘅消息，成件事好有爸爸嘅作風，你乜都睇得咁樂觀，爸爸係冇嘢做唔成，唯獨係做唔到嚿電芯，因為爸爸只有正極，係冇負極，正能量爆滿，爸爸係所有人心中嘅開心果。好掛住嗰個10點半電台開工，10點先聽到電話響，再聽多一句『哎呀』，然後牙都唔擦就衝去返工嘅爸爸！我問你個口咁臭會畀人聞到，但係你話『是但喇』，啲聽眾都聞唔到。無錯，爸爸真係好污糟，不過，幫佢澄清返，大家都以為爸爸污糟到唔會沖涼，其實爸爸一日係沖兩、三次涼、一日洗廿幾套衫，只不過都係得一條底衭。」
【點擊睇圈中好友哀悼林超榮】：
陳淑蘭續讀：「爸爸，你咁鍾意講嘢，喺另一個世界，記得開返場棟篤笑任你噏，再開間書店同文具店，到時大把筆畀你偷，冇人再話你用鋼筆用到漏墨隻手變黑色喇！爸爸生前真係好鍾意筆，見筆就攞，前日已經得到朋友馬小強證實，爸爸係患有『戀筆癖』，爸爸對筆嘅喜愛程度，大致動用伊利沙伯醫院醫療團隊，為已經轉院嘅爸爸喺舊病房找尋失物鉛筆一支，當中有誇大成份，請自行斟酌。」
林超榮三女亦在信中提到爸爸的好心事：「爸爸，你喺滂沱大雨中，都不忘拯救一竇BB貓，唔知係咪因為佢哋喺你書店大，成日昅你做緊乜嘢，而家越嚟越似你，畀我哋叫做肥仔，又係一隻污糟貓，一切嚟得太急喇，最後一句，聽爸爸你講嘅嘢『嘩！梅菜剁豬肉，正呀』，邊有人做化療都咁有胃口㗎，爸爸，你真係好努力、好叻、好犀利，我哋永遠愛你，你永遠都喺我哋身邊，雖然WhatsApp嘅訊息以後都唔會全現已讀，但係你對我哋好，對我哋嘅付出，呢一生人做過嘅好事，我哋所有人收到晒，再見喇，爸爸！」
【相關閱讀】：
林超榮逝世丨師傅黎文卓爆徒弟兩個月前響警號 激瘦15磅證患血癌化療後被細菌感染
林超榮逝世｜猝逝原因曝光！田啟文揭中新冠肺炎感染併發症 昨晚突發入院
林超榮逝世｜林超榮兩年前談生死人生無憾 自揭立平安紙留物業予女兒
林超榮逝世｜90年代接替曾志偉主持《開心主流派》爆紅 《低俗喜劇》成近年代表作
《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
