方太現身《流行都市》大爆當年教煮餸秘聞曾與安德尊合作稱讚後生好乖又照顧人

更新時間：21:00 2023-12-23
發佈時間：21:00 2023-12-23

被譽為香港「烹飪界始祖阿媽」的方太（方任利莎），從70年代末在婦女節目大顯身手，到80、90年代更擔大旗主持《方太生活廣場》等節目，形象深入民心。TVB婦女節目《流行都市》邀請89歲的方太亮相節目，雖然她當年一直效力亞視，但激罕現身TVB節目，當不少觀眾感到驚喜，方太更在節目中大爆當年在節目上直播烹飪過程的秘聞。

【相關閱讀】：89歲方太激罕出山精靈拍廣告！仍然熱愛烹飪每周行街市兩次掃貨

【點擊睇方太亮相《流行都市》】：

方太現身節目時向主持安德尊（大王）及姚嘉妮先戴高帽，之後談到近況時，方太語帶輕鬆表示：「我冇做嘢，可以講半退休，我做我自己啲嘢啦，平常生活。」安德尊問到怎樣平常時，方太打趣道：「你學唔到，你仲後生，我唔係太晏起身，我早起身嘅，（咩鐘數呀？）7點幾啦！起身之後食早餐啦！睇吓今日有啲咩做下啦！或者見吓朋友，喺屋企自己ＭＥ摸吓啦，係咁架喇！」更表示有睇《流行都市》。

之後提到方太養了16年的愛貓「嘉嘉」，姚嘉妮一度誤會是講自己，方太之後又再讚主持姚嘉妮：「靚女就鍾意佢（姚嘉妮）啦」，之後才續說：「嘉嘉好乖㗎，佢有自己嘅生活，（佢唔騷擾你？）係啦！（陪你？）會啦！佢有佢自己一套囉，最緊要係我細女（阿寶）鍾意佢。」

方太忘記入行年份

被問到從何時起開始教煮餸時，方太直言不太記得：「我頭先都同個女講，我都唔記得，好似99年」，原來方太從1979年加入節目主持烹飪環節，談到當時的趣事，方太自揭第一次作現場直播時好緊張，更發生放送事故：「第一次就好緊張啦！第一次上電視梗係緊張啦！誰不知撻唔著火，喺節目之前我有撻過，著火嘅，到我煮餸嘅時候冇喇！原來係最後一啖氣呀，之後同觀眾講，真係唔好意思喇！今次係我第一次上電視，居然撻唔著，不如我依家用口講點煮呢個餸啦，咁捱咗10分鐘度啦。冇得落台，出緊街呀，所以返到去我烹飪學校，俾我老闆鬧我囉，佢睇緊嘛，諗住你第一次上電視，見咁樣咪鬧我囉，『你有冇搞錯呀？你搞乜鬼呀』。」

安德尊爆方太禁入廚房

其後有報章為方太講好說話，她憶起當年道：「當年好得意，有張報紙第二日就話噚日電視有個新面孔，但佢撻唔著火，不過佢都好淡定，希望大家畀啲機會佢啦！我心中真係好感激，唔知佢係邊個，真係好喇！」安德尊曾與方太合作，他指當年方太不容許其他人入廚房或掂任何嘢，不過方太就稱讚安德尊說：「佢好乖，佢好合作好照顧人，當時做呢個烹飪節目好多人，我嗰陣時有個要求，我自己一個人做我就做，如果好多人我就唔做，你係上嚟介紹煮餸丫嘛，呢個嗰個好似好亂。」

【點擊睇方太生活照】：

當年曾推出烹飪書的方太，透露試過一日煮30個餸：「嗰個係影雜誌，其實你唔使真係煮熟，因為你影相丫嘛，但你要俾人睇到係煮熟嘅，（諗30個餸唔重複好傷腦筋！）比較係會麻煩啲嘅。」她估計多年來煮過逾千道菜色，不過自己未有統計，更笑言：「我有錢收就得喇！」對於教煮餸的秘訣，方太坦言沒甚麼秘訣：「唔好覺得呢個餸淨係我識煮，你唔識煮，我話好食就得喇，你要教識對方煮丫嘛，你要教識對方覺得好食先得嘛，唔好淨係以自己做標準，（跟食譜就做得到？）係呀，我寫食譜嘅時候，我唔單止試過啦，同時我以對方嘅角度嚟寫嘅，我鍾意食咸啲嘅，大家食呢個口味啱唔啱囉。」為配合港人口味，方太會將菜色作改良，因應港人口味。

對於做烹飪主持要具備的條件，方太認為要起碼識分生定熟，而自己更收藏有100條圍裙，不過已將部分送給別人。對於給予晚輩的忠告，方太打趣指安德尊不下廚，沒有事需要留意。而她的口味比較清淡，亦喜歡食水果，方太笑說：「我同我細女成日講笑，我希望做一隻有錢嘅馬騮，有錢馬騮自己去買丫嘛。」

方太談家人相處之道

被問到與家人的相處之道，方太表示：「我又唔敢講我係標準啦！我只可以講我嘅方法啦，我同啲仔女就好似朋友一樣，佢哋細個嗰陣時就唔同啦，你要管教佢啦，我比較嚴啲㗎，但有嘢可以商量，朋友一樣可以大家商量，到咗佢哋出嚟做嘢，咁更加好似朋友一樣啦，我記得我個仔初初出嚟做嘢嗰陣時，佢會講公司啲嘢俾我聽，嗰時我都做嘢嘛，有一日我好攰，佢講到11點幾12點，我同佢講『阿仔聽日先講好唔好呀？』我實在好眼瞓。」其細女更陪伴在側，如經理人一樣照顧。