36歲女歌手曾陷抑鬱無錢睇醫生 住200呎蝸居晾衫三日唔乾Fans送抽濕機
發佈時間：20:00 2024-01-10
Gin Lee李幸倪2010年從馬來西亞來港發展，日前在《2023年度叱咤樂壇流行榜頒獎典禮》獲得「叱咤樂壇女歌手」銀獎，以及憑《Dum Dum》登上「專業推介．叱吒十大」第二位！最近Gin Lee網上紀錄式遊歷專訪節目《枉談》來到第二集，帶拍攝團隊重回初來港住的北角舊居，提起愧對父母，Gin Lee更忍不住落淚。
Gin Lee李幸倪
李幸倪媽咪驚訝入唔到篋
Gin Lee在節目中帶拍攝團隊由觀塘坐輪到北角，原來北角是Gin Lee初來港發展時第一個住的地方，走到大廈樓下，Gin Lee表示以前住頂樓，二百多呎的兩房單位，一間睡房、一間用作衣帽間，冬涼夏暖，由大門走睡房，不過三步距離。Gin Lee記得第一次父母來訪，媽媽看到她的居住環境，忍不住哭了出來：「佢哋攞咗兩個大篋，但望一望個地方，兩個人兩個篋係入唔到嚟，我阿媽就好心噏，喊咗。阿媽覺得唔慣，因為喺我哋家鄉每個人閒閒地都幾千呎，佢就會覺得原來咁大對比。」
當中亦發生不少被Gin Lee視為的小趣事：「話說我阿媽有次發脾氣，因為每一次煮飯佢都會撞到周身瘀晒，你知煮飯嘅人又熱又盛，一轉身又撞跌嘢、一轉身又撞親，成件事好唔聚財，佢就覺得，唉，好煩。」Gin Lee續說：「有一次我阿媽坐咗喺梳化睇電視，我見到阿爸冇位企又冇位坐，佢就入咗我擺衫嗰間好亂嘅房，佢擺咗張摺櫈喺入面飲咖啡，哈哈，個情景係好得意。我問佢：『你做乜喺裏面呀？』佢話：『我終於搵到個位坐啦。』哈哈。」
Gin Lee謂當時覺得有地方住已經很開心，但對香港潮濕的氣喉不明所以：「我第一次見到啲牆係會滲水，啲衫晾咗三日都唔乾，我唔知點解，後尾fans話俾我知，『太濕啦你屋企！』佢哋好好，買咗部抽濕機俾我，我先知道原來香港係咁濕。」
李幸倪家人搬來香港
去年Gin Lee簽約英皇後，父母及家姐都搬來香港住，又於今年的頒獎禮上獲得不錯的成績，隻身來港發展、一句廣東話也不會的她亦經歷過一段黑暗時期，抑鬱症狀一一浮現：「完咗第一間公司，未簽第二間公司時，冇晒方向，又冇人脈，齋等，個過程好漫長。一天黑就喊，喊到天光，天黑開始驚，唔知點算好，我乜嘢都捉唔到，所有嘢都唔屬於我，我喺呢個地方做乜嘢？以為自己好有實力，但原來冇呀！好多呢種負面聲音。又冇鐖、又唔敢同人講。迫到自己個情緒去到臨界點。我係feel到自己如果再唔掹番自己返嚟，我可能返唔到轉頭。」問到Gin Lee有否求醫？她無奈說：「嗰陣時我冇去睇醫生，我都冇錢睇醫生，睇醫生好貴，山窮水盡啦，我剩番嘅錢一係要嚟買機票、一係要嚟食飯、一係交租，幾時排到睇醫生呢？」
李幸倪自覺愧對父母爆喊
從大學開始便已登台表演賺取學費、給家用的Gin Lee回望這段日子，坦言覺得愧對父母，她強忍淚水：「心諗：『你咁大個女……自己嘅嘢都搞唔掂，又養唔到爸爸媽媽……』我屋企唔係窮，但我覺我大個女啦，我唔想爸爸媽媽咁辛苦……我嗰陣時好嬲自己，係因為我過到嚟香港，以為所有嘢會更好，但係所有嘢係變得好差，搞唔掂自己嘅嘢、又養唔到爸爸媽媽，我係咁怪自己。」慶幸的是最後Gin Lee一一捱過，「我揀咗自己去撐，經歷過一個咁黑暗嘅時間，之後再遇到相似嘅問題，我唔係唔驚，但我有信心可以克服。」
其他文章：
李幸倪 林奕匡 廖子妤揭童年過癮秘史 為Sell配音動畫笑談溫馨手足情
Gin Lee李幸倪與fans開電車生日派對 收巨大化一物超驚喜
《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
