MIRROR演唱會丨AK胞兄捧場引發公關災難！指Anson Lo似馮素波又似鑽石人焫㷫神徒要道歉

更新時間：23:00 2024-01-22
發佈時間：23:00 2024-01-22

MIRROR一連16場演唱會《MIRROR FEEL THE PASSION CONCERT TOUR 2024》於上周日（15日）在亞洲國際博覽館展開，12子的家人都陸續入場睇騷。MIRROR副隊長AK江𤒹生的親哥哥Ambrose昨晚（21日）亦有入場支持，更不忘在IG打卡，卻被指公然狂踩AK隊友Anson Lo盧瀚霆，又疑似嘲諷Edan呂爵安，焫着細佬隊友。

AK大佬睇演唱會焫着MIRROR隊友？

AK哥哥Ambrose昨日於IG Story以「GOOD SHOW」鼓勵細佬，本來沒甚麼特別，但他其後竟轉發疑似為其友人拍攝的一段Anson Lo片段，友人以「馮素波」來稱呼Anson Lo，Ambrose則回應稱：「真係好似海賊王入面嘅鑽石人！」似乎是指日本動漫《海賊王》中白鬍子海賊團的第三隊隊長Diamond Jozu，這個角色能夠全身化為鑽石，扺擋強大的物理攻擊。帖文一出隨即引起一眾「神徒」不滿：「真係好唔尊重人」、「話晒都係AK團員」、「好冇禮貌」，雖然其後已經刪除，但仍難熄眾怒。

除了Anson Lo外，Ambrose下一個IG Story同為轉發影片，內容為Edan擔任演唱會彩蛋環節的片段，當時他分享了一個有關拍電影前小朋友媽媽患癌症的故事，並寫上：「尋日聽完呢個彩蛋，心諗佢係咪想寫保險，不過真心好感動。」由於Ambrose正職為保險顧問，有指他可能因此感受特別深，但亦有人認為他是取笑Edan。

立即為AK撇清關係

Ambrose最初回覆一名粉絲指：「等我解釋一下先，馮素波就真係我粗心大意，如果我見到就一定會轉發，這都是我會del post的原因，呢啲係我問題，我願意承擔責任，你哋要怪就我好啦。」至於指Anson Lo像鑽石人：「鑽石人方面，或者我講解下鑽石人由來，因為我由細到大都睇海賊王，有個好似鑽石一樣堅強，佢呢套衫令我換咗喺呢個童年嘅回憶，而且佢真係跳得好好睇，令到你又誤會，希望可以解答到你，亦都希望令你可以開心返。有咩問題隨時可以PM我。」

MIRROR演唱會精華重溫：

眼見事態嚴重，Ambrose即公開回覆各粉絲表示：「係時候到我公開解畫啦，首先澄清第一樣嘢，本人對AL就冇任何惡意，真心欣賞佢嘅表演表現，真係精彩的。其次鑽石人在我心目中係一個非常正面嘅角色，佢忠心而且堅強，相信有睇過海賊王頂上之戰都會明白。再深一層嘅解說，每一粒鑽石都係獨一無二嘅存在，代表住純結同堅硬；第三因為牽涉到另一位娛樂圈嘅前輩（馮素波），所以最後都係決定DEL POST會比較適合。」

他其後再為Edan一事解釋：「另一方面首先再次澄清，本人對EDAN十分欣賞，絕對沒有半點恥笑之情。其次岩布仙尼係佢自己講的，我更沒有取笑成份。『保險』二字對我而言，除咗係我嘅職業之外，喺我眼中都係愛與責任，我絕對唔認為呢一樣嘢係個貶義！而佢面對緊嘅果種無法控制無法改變的無力感，係我經常需要面對嘅一個唔好受嘅情緒。所以昨晚喺現場的我，真係好感觸有好深感受，我好有共鳴感。我都忍唔（住）流咗一滴眼淚。所以如果有任何誤會，誠心抱歉。」

自認與MIRROR成員為朋友

最後他又表示：「最後成件事，我想講少少感受。我睇住佢哋12個由參賽，都上我屋企傾點樣去比賽，再去到出去開SHOW，再去到之後大家曾經成為PARTNER，佢哋嘅高低起跌，我都喺身邊。其實對我嚟講佢哋全部都係我嘅朋友，所以我更加唔會對佢哋有惡意。我明白當中係有一點誤會，或者我表達都未夠好，呢一樣我都會引以為戒。而且我都明白其實好多粉絲，其實佢真係好愛佢哋嘅偶像，多謝你哋嘅支持，佢哋先至可以繼續走落去。其實我公開得我個帳戶，我有一直講咁多時事評論嘅事情，其實就係想鼓吹一個更加開放嘅討論空間。所以大家有任何問題或者幫忙都繼續DM我，希望可以消除大家嘅情緒，令大家都開開心心。」