93歲黃夏蕙試過「畀鬼責」足一個月連工人都搣到瘀晒 渴望見到祥嫂：而家都好掛住佢
發佈時間：19:00 2024-03-26
人稱「夏蕙BB」的93歲黃夏蕙，在娛樂圈縱橫近70年，當然遇過不少經歷，日前黃夏蕙應「鬼王」潘紹聰邀請為《恐怖熱線》擔任嘉賓，在節目中分享3個從未公開的恐怖經歷，黃夏蕙提到年輕時，曾與姐姐和姐夫同住跑馬地山村道一個單位，試過連續一個月晚晚「畀鬼責」。
相關閱讀：黃夏蕙讚老公好浪漫每年情人節都送花 過年後超忙為電影《夏蕙傳》選角
黃夏蕙分享恐怖經歷：
黃夏蕙去祥哥祥嫂別墅靈探
在節目中，黃夏蕙分享了多個從未公開的恐怖經歷，她先分享了一個2年的靈異事件，當時是來自一次個靈探節目的體驗，黃夏蕙說：「嗰次係某網台邀請，去到一個地方好大又好陰沉，原來係祥哥祥嫂間屋，我個心即刻好唔舒服，因為呢兩個係我嘅摯愛，係我兩個最好嘅朋友，我哋又無所不談，對於佢我係唔驚，我都希望或者可以見到佢，畢竟都過身咁耐！」潘紹聰指這間屋其實是已故武打影星傅聲的故居，祥哥祥嫂亦未曾入住過，黃夏蕙說：「嗰陣我哋同傅聲一家都係好好嘅朋友，差唔多隔幾晚就去傅聲屋企唱歌，佢爸爸都鍾意唱粵曲，成日喺屋企開音樂會。後期知道呢間屋係傅聲嘅爸爸買嚟送畀個仔同甄妮結婚。」
當攝製隊放好祭品後，黃夏蕙心想：「世侄我嚟探下你啫，我都想睇下祥哥祥嫂，睇吓佢哋有冇講畀我聽。」結果儀式過後，坐着的黃夏蕙突然感到「突然有個波喺我膊頭飛過」，於是即場問在場人士：「你哋睇唔睇到個波？但係佢哋睇唔到，我咪當係同我玩。」後來，當他們在屋內四圍拍攝時，攝影師竟拍攝到玻璃窗透出一個人影的相片：「嗰陣個心係好驚，但係好明顯係女人嚟，好摩登，好靚！」黃夏蕙直言希望那個人影是祥嫂：「我而家都好掛住佢！」潘紹聰就問如果真的見到祥嫂，有甚麼跟對方說？夏蕙BB坦言會跟祥嫂說：「希望佢安息，最緊要喺下面過得開心！」
黃夏蕙親眼目睹白色靈體飛走
而第二件令黃夏蕙最歷歷在目的恐怖事件，就是當年人稱「萬能旦后」鄧碧雲的喪禮前夕。當時有做花牌、花籃生意的黃夏蕙，平日只會做喜慶用的花牌，但因為當年鄧碧雲是她的好姐妹，故特意安排殯儀人士，到其位於匡湖居一起造花牌，並逐一為賓客寫輓聯。沒想到，當她深夜外出買宵夜時，突然收到女工們的電話，很驚慌的說：「快啲來，有嘢呀，唔得喇！有隻嘢飛咗來呢度！」當時黃夏蕙趕回家，發現眾人齊齊躲起來，聲稱「靈體飛到樓上去」，但因為大家要趕造花牌，硬着頭皮繼續工作。沒想到過了幾小時，樓上突然傳來聲響，黃夏蕙憶述看到靈體的經過：「好似仙女，白色嘅，睇住佢飛，喺樓上一路飛咗出去海，離開咗！」但黃夏蕙事後相信是好姐妹來探望：「我有諗，應該係佢……係我好姐妹嚟嘅！」
娛樂圈藝人靈異經歷：
黃夏蕙試過連續一個月晚晚「畀鬼責」
不過最令人毛骨悚然的，就是黃夏蕙年輕時持續一個月晚晚「畀鬼責」，黃夏蕙當時曾與姐姐和姐夫同住跑馬地山村道一個單位：「嗰陣晚晚都『畀鬼責』，仲要係每晚到特定時間就嚟，由腳一路責上來，我乜嘢經都唸齊晒，但係佢都係唔肯走，成個人唔郁得，到咁上下佢就會走，走咗之後就飆晒冷汗！我啲工人就畀佢搣到瘀晒，家姐就打畀佢一巴巴咁打！」事後黃夏蕙和家姐四圍打探，才得知原來這單位原本住着一對夫婦，有一日兩人去遊車河，在山頂位置發生意外反車，「一個吊喺樹，一個死咗！於是呢間屋就頂咗畀我哋住。」結果她們立即找來高僧打齋，又安放了神位，每天裝香供奉：「不過我都唔敢住，佢晚晚都嚟，所以跟住就搬走。」
其他文章：
重溫黃夏蕙上頭炷香破格造型！03年被扯甩假髮 神心上香全因鄧碧雲鳳凰女？
黃夏蕙92歲壽宴！細女Maggie激罕現身香港 氣質神態倒模媽咪
黃榕「獨食」單拖出席收錢活動掟走薛影儀 夏蕙BB仙女下凡應節
-----------------------------
《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
