文頌男逝世｜逝世前3個月受訪 樂觀面對「治療無效」 憶父因情婦拋妻棄子由媽媽獨力撫養：對佢好愧疚

J2節目《不正常愛情研究所》主持文頌男（Koba）去年12月公開患罕見的尤文氏肉瘤（Ewing's Sarcoma）。直至今日（13 日）晚上，相信由他生前親自撰文、分享逝世消息的文章，在文頌男的社交平台出現，宣布他已經逝世，終年29歲。

文頌男在今年3月接受《星島頭條》專訪，當時他指由發病起至今年4月已停工大半年，無奈經歷五次化療後，3月時已宣告治療無效，椎間近盤骨的惡性腫瘤疑有增大跡象。

文頌男逝世前半年歷盡痛苦 仍積極面對

當時文頌男面對痛症日夜煎熬、藥物副作用嚴重影響生活，正等待下階段治療，他坦言的確是度日如年，對前路感到徬徨，但仍會積極對抗病魔。當時他回想大學時期曾因情緒抑鬱而想過輕生，經歷大病後內心更強大的文頌男豁達地說：「有咩重要得過你就嚟要死？以前好關注或者為啲咩同人嘈，而家都覺得好無謂、好少事，最緊要自己活得舒服、開心。」

相關閱讀：J2患癌主持文頌男完成化療 撰千字文交代病況：活得好冇尊嚴

文頌男談抗癌：

文頌男零生產嘆冇生存意義

文頌男在逝世前約半年，為免感染病菌加上體力不足，除了到醫院覆診外，文頌男一度有兩個月沒外出見朋友。

他在受訪當日，趁精神稍好在老友Dean攙扶下，從屯門寓所乘車往YouTube頻道「閃芒」辦公室，其間全程墊住自備咕𠱸就住坐。當日，文頌男亦特意戴Cap帽兼畫眉遮倦容，直至回到熟悉的工作環境，看到昔日朝夕相對的面孔，其心情明顯輕鬆愉快得多，甫進公司便迫不及待向鏡頭展示過去兩年的心血，包括自購戲服、DIY街訪道具及巨型月曆等，並逐一細訴與戰友們的難忘點滴。

訪問中段，文頌男從袋中摷出藥物按時服食。由於腫瘤壓住椎間神經，文頌男試過下半身持續劇痛30多小時，經化療後本來痛症大大下降，惜後來痛症再次，現時需長期服藥舒緩痛楚。「10分滿分嘅話有8、9分痛，係好多種唔同嘅痛夾埋，譬如放射痛、俾針拮及火燒嘅感覺，主要由大髀到膝頭後面，而家就算食藥都Keep住2、3分痛，間中會突然持續兩個鐘劇痛，痛到意識模糊。」

然而化療與止痛藥的副作用卻對生活造成影響，文頌男指因食嗎啡致記憶變差、嘔吐，最難受是便秘同時出現腹瀉感，大半年來只能長留家中養病，「食瞓屙好似好簡單嘅事，但對我嚟講係好難解決。開始覺得咁樣生活好冇意義，唔可以工作、社交，但呢個年紀係應該好多生產力，我就諗，究竟浪費啲時間喺度做乜？不如唔好再生存落去喇。」幸他很快便打消負面想法，除家人和朋友的支持外，為自己生存亦成為他最大動力，「只要Keep住生存，我就要努力去對抗呢樣嘢，盡量令自己活得舒服啲，希望自己可以繼續活落去，好番之後做到好多唔同嘅嘢，呢個先係最大嘅信念。」

文頌男活在當下向母表愛意

言談間文頌男一直表現堅強，惟提及家人即難掩情緒，數度落下男兒淚。談到成長路上歷盡坎坷，12歲時父親為菲律賓情婦拋妻棄子，更留下大筆債務，文媽媽惟有密密做獨力養大一對子女，終於捱到囝囝取得藝術管理及藝術教育雙學士資格。文頌男畢業後還加入夢想行業，惜不久再次遇上人生重大難關，就是病魔來襲。

年過60的文媽媽為方便照顧病兒，索性辭去日間工作，晚上8時至清晨6時則做清潔工幫補家計，文頌男嘆道：「我冇工作仲要佢照顧我，自己都好愧疚。」昔日覺得一切都是理所當然，一場大病令文頌男頓覺，家人和朋友無私付出的可貴，亦真正領悟到「活在當下」。他由從前不敢表達愛意，到現在逐漸放低「包袱」擁抱身邊人，說罷他忍不住淚流如下：「有時見阿媽幫我做啲嘢，我會同佢講『媽咪，我好愛你』，以前好少表達呢樣嘢，可能我驚自己時間唔係好多，就算朋友，以前好多嘢都覺得好尷尬唔應該講，而家諗到想講咩就講咩，其實你愛佢咪講出嚟囉。」

文頌男公開人生願望清單：

文頌男最牽掛「死黨」

「有時諗到自己未必治療成功，有一日離開呢度的話，我最擔心嘅唔係屋企人，反而係朋友。」文頌男當時說。

由於自幼與媽媽相依為命，兩母子關係密切，加上早年踏入社會幫手還清債務，目前經濟狀況尚算穩定下來，因此他認為家庭方面可說是無憾：「如果我離開咗都有部分錢留畀阿媽，佢一直都想退休後返泰國住，喺泰國鄉下啲嘅地方需要用嘅唔多，應該都夠佢生活，所以唔算好擔心。」

不過，倒是一班「死黨」最令文頌男牽掛，「因為Best friend好依賴我，好擔心我唔喺度佢點算呢？冇人可以睇住佢、畀到情緒Support佢哋。我都想同佢哋做好多嘢，可能一齊拍攝，呢個年紀應該喺工作上可以同佢哋Achieve（實現）好多嘢，但我做唔到。」人生無常，他寄語年輕一輩努力實踐夢想，「如果好似我咁，時間無多，你就會發現所有外來壓力同聲音都唔重要，有咩想做、想講就唔好再拖，要投入去做，只要Keep住熱誠努力做，係一定有回報同進步。」此時，鏡頭後突然傳來陣陣抽泣聲，原來是抑壓多時的好友難捨落淚，氣氛沉重。

到訪問尾聲，雖感前路茫茫，但文頌男當時仍樂觀為自己打氣：「無論遇到咩難過嘅事、嚟緊有啲咩困難或障礙，我都要努力面對，唔可以放棄，我會堅持，我會有更大嘅勇氣去面對所有事情。」語畢他深呼吸一口氣堅定地說：「我一定會好番㗎！」

直至今日（13日），知釋文頌男逝世，望他的家人及好友節哀。

文頌男更多生前照片：

其他文章：

J2患癌主持再現幕前！身形消瘦依然活躍 食嗎啡試忍痛試鏡扮正常

J2文頌男自揭坎坷命運被父親拋棄變街童 患罕見癌症心酸哭訴：好慘

J2患癌主持文頌男自揭變「無眉男」 本周最後一次化療精神轉差：感覺就嚟死