全港戲院日2024丨陳家樂嫌活動只辦一日太少錢嘉樂希望政府幫助電影業

即時娛樂

更新時間：17:25 2024-04-10
發佈時間：17:25 2024-04-10

陳家樂、錢嘉樂、霍啟剛今日（10日）出席「全港戲院日2024」活動，大會公布4月21日為全港戲院日，所有電影，無論任何放映格式，票價劃一港幣30元，當日超過70部電影上映，並於4月17日中午12時開始購票。

陳家樂、錢嘉樂、霍啟剛今日出席「全港戲院日2024」活動

立法會區議員霍啟剛表示曾建議政府留意電影產業鏈，除了搞活動支持戲院外，亦需要構思更多元素幫助業界，見到今個復活節的票房數字，反映出業界經營得很辛苦，希望這個優惠連串帶動下幫到餐飲業等做到夜經濟。

霍啟剛希望這個優惠連串帶動下幫到餐飲業等做到夜經濟

以活動大使身份出席的陳家樂，坦言很喜歡到戲院睇戲，因為可以跟陌生人睇戲一齊笑又一齊喊，但認為「全港戲院日」只舉行一日太少，所以有跟霍啟剛反映，並建議優惠日明年應增至一星期。他說：「啲人啱啱培養想入戲院睇戲嘅氣氛，跟住就結束，應該做多幾日帶動多啲觀眾入場。」身為香港動作特技演員工會會長的錢嘉樂，則謂自從做爸爸後，經常入戲院跟囡囡睇卡通片，亦會跟太太湯盈盈到戲院睇IMAX電影，先覺得夠震撼。他說：「我認同家樂話同陌生人一齊睇戲，一齊笑、一齊喊，呼吸係同步，喺屋企做唔到。」談到可覺帶動夜經濟？錢嘉樂坦言會帶出生活鏈，因為睇戲前會行街吃飯，又會買玩具畀小朋友，並笑謂自己出街陪小朋友只是做「阿四」，但覺得好開心可以享受親子樂。在旁的陳家樂大讚錢嘉樂是好爸爸，又爆錢嘉樂在囡囡面前以身作則，扮早睡覺。快將做爸爸的陳家樂，則謂聽過不少爸爸級藝人朋友指要努力賺錢，但不可錯過小孩的成長時光。

活動大使身份出席的陳家樂，坦言很喜歡到戲院睇戲

陳家樂認為「全港戲院日」只舉行一日太少

陳家樂覺得應該做多幾日帶動多啲觀眾入場

陳家樂大讚錢嘉樂是好爸爸

另外，有指導演劉偉強有意找謝霆鋒為新戲做主角，但經濟不景被煞停。而最近網大《反黑2》，因資金不足而停工。錢嘉樂坦言80年代入行已經重複類似情況，除了戲院外，亦要吸引更多投資者，不可以集中單一市場，並笑謂《無間道》導演劉偉強開戲也遇上困難，所以新導演拍完一部戲好難開第二部，希望政府多點幫助業界。陳家樂則認為只是個別事件，本身工作暫時沒有影響。他說：「點都好，都要對電影有信心，唔好一、兩件事件就對行業咁灰。」錢嘉樂話：「電影人好勁，馬死落地行。」