吳若希爆老公殷勤接送女員工 貼文公審：趷起條尾就知你做咩啦
發佈時間：14:50 2024-07-09
吳若希（Jinny）與老公何兆鴻（Alex）在2017年結婚，育有一仔一女，Jinny 近年經常在社交平台公審老公，今日（9日) 她再次發文公審老公，直斥老公為女員工管接管送，還cap圖公開兩公婆的火爆對話。
相關閱讀：吳若希32歲生日晒Hermès限量版手袋！與天王同款至少值30萬 曾只愛背囊變富貴
吳若希又發文公審老公：
吳若希與老公的對話包含粗口，她嬲爆向老公表示：「好L Sweet呀，仲可以同人一齊搭地鐵返工！」老公即解釋只是要對方簽MPF，吳若希寸爆回覆：「真係好大嘅原因呀，叫佢簽MPF，就要車人返工，又要陪人搭地鐵，好XSweet呀，你唔好俾人影X到呀！」老公Alex 反駁謂：「其實我真係已經好多嘢煩，我唔明點解我咁樣我都要比（被）人鬧，我唔同你講鬧我都正常，我真係做嘢，我之前幾年做垃圾做唔到嘢又鬧，我而家做正經嘢都鬧！」吳若希續問：「做嘢又要俾我鬧？你做啲咩俾我鬧？」
吳若希公開鬧爆老公截圖交代來龍去脈
吳若希公開截圖後，再交代事件的來龍去脈，並發表感受表示：「其實呢，女人呢係好敏感嘅，你趷起條尾，都已經知你會做咩㗎！今朝何生好積極咁話要車同事返工，俾我話完之後，好有骨氣地講，連車都唔揸自己搭地鐵！我又唔知點解，突然間覺得佢應該係搭地鐵搵佢公司同事，我Chok完佢第一句，佢又真係答我係Wor！即係我自己都有公司，都有幫人哋供MPF，我而家先知原來MPF需要老闆親自攞文件俾員工簽！男人呢，就好得意嘅，身有屎嗰陣呢，就會話自己已經好多嘢煩，怪番女人唔體諒佢！」
吳若希再以黑底白字向老公作出警告
未經，怒火中燒的吳若希再以黑底白字向老公作出警告：「作為太太，要提就提咗GA LA，佢選擇尊重你，定係選擇無視你，係佢嘅決定。有啲人會忍，有啲人會嘈，我呢，同呢個人相處咗八年，太清楚佢咁嘅回答係代表咩！所以呢講埋今次，之後大家喺條街度見到佢同第二條女一齊，唔好大驚小怪，因為佢都係做嘢嘅啫！」
吳若希婚後變濶太鍾意Hermès：
嬲爆的吳若希繼續連環出post ，她表示上完跳舞堂收到好多安慰和支持的訊息，並謂要好好增值自己去準備獨力養起頭家：「放心，我真係冇嬲～與其花時間喺呢啲位，我會選擇好好增值自己！做好一對仔女嘅榜樣。TOUCH WOOD 真係要成就人哋一對眷侶嘅話，我起碼有能力養起一頭家畢竟最愛既都係一對仔女。」未幾，吳若希貼出一名MPF經紀的卡片並表示：「介紹返呢位經理級，親力親為，唔需要客戶走來走去。我都深信佢，唔會要求個老闆特登走去個女員工屋企樓下叫佢簽名，再陪佢一齊搭地鐵返公司。」
吳若希直接搵負責的MPF經紀對話：
原來火爆的吳若希直接搵負責老公Alex 公司的MPF 經紀，貼出與經紀的對話：「Alex 公司個MPF 關唔關你事？ 想八卦吓而家咩情況？係咪需要 Alex親自走去搵個員工簽返名，今日之內要俾你？」MPF 經紀即澄清沒有這回事：「唔係呀 ，我同佢溝通咗 ，我聽日下午會去葵涌公司搵佢員工簽名呀！」吳若希回覆謂：「？但係佢今朝已經去咗佢員工屋企搵佢簽名喎，因為佢話要趕做銀行嘢。」吳若希更大爆該名女同事的居住地區並寸爆表示：「頭先諗諗吓，唔應該誤會人哋個AGENT，可能人哋個AGENT已好努力 。BTW，大家都唔好誤會何生，佢女同事喺啟德，我哋住喺何文田，又真係好近嘅～何生呢種反向思維，好忙但係唔想麻煩到個AGENT，要親自去搵女同事，而唔係直接返公司等女同事返工，都情有可原嘅。」
吳若希曾解釋「公審」老公原因
吳若希早年曾在節目解釋在網上「公審」老公的原因，吳若希表示：「我會將好多人擺喺心裏面唔敢講嘅嘢，全部講晒出嚟。好多人覺得家醜不可外揚，但我唔係，唔啱嘅嘢我講咗好多次，而你都係唔聽嘅時候，我教唔到，咁就由出面嘅人教你，我係咁嘅心態。」
其他文章：
吳若希囡囡正面激罕曝光！眼大大似媽咪被讚靚女 曾為保護愛女樣貌鬧爆網民
吳若希月內兩度遭偷竊！公開閉路電視向賊人喊話：希望幫你過咗難關先
