鄭中基與女經理人風波惹揣測！稱與余思敏好幸福 患抑鬱症要停工接受戒酒療程
發佈時間：14:35 2024-08-06
鄭中基（Ronald）日前突然於FB宣布與「機動娛樂」立即終止合作，原因是發現經理人何慶湘「工作及道德操守有問題」，與此同時，鄭中基更指自己因情緒健康問題將會暫時休息，聲明一出，事件惹來外界擔心鄭中基目前的狀況，今日（6日）鄭中基再發聲明並指：「喺搞笑、娛樂大家嘅背後，發現咗有抑鬱症，當時靠食藥控制，然而我再次做咗個錯誤決定，選擇咗飲酒去逃避現實。」
相關閱讀：鄭中基突宣布與經理人何慶湘終止合作！合作開YT頻道4年大受歡迎：工作及道德操守有問題
鄭中基再發聲明坦承患上抑鬱症並靠飲酒逃避：
鄭中基早前突然宣布與經理人何慶湘終止合作後，再表示：「因個人情緒及健康問題，決定高雄演唱會後離開，好作休息，多謝大家一路支持。」事件惹來外界對鄭中基健康和情緒的揣測，今日鄭中基為自己的健康問題再發聲明，全文如下：
大家好。
早前我發咗一個關於我公司同埋我健康嘅聲明，引起咗好多朋友嘅關心亦引起好多嘅猜測。基於公司嘅事情係會如常運作，希望可以好好咁處理再次交代，唔想影響太多人。
今日我想講一下我自己嘅問題。大家平時見到我大癲大肺、拍搞笑戲、開channel拍片、開演唱會，表面上好似無嘢咁。其實咁多年嚟我都仲係一個唔識得面對壓力同埋唔成熟嘅人。仲記得2000年我因為喺飛機醉酒鬧事，引致好多我嘅fans失望，仲有影響到我嘅家人，後來我決心戒咗酒，想要做一個清醒嘅人。之後喺冇向公眾交代情況下，我經歷咗一段好短嘅婚姻，呢段婚姻令到我好唔開心，亦好好咁反省過自己嘅問題。
直到我遇到我太太余思敏小姐，係佢令我覺得我要走入另一個人生階段嘅人。我哋一起組織咗一個家庭，有兩個小朋友，喺一件好幸福嘅事。但當面對壓力、面對工作、面對人嘅時候，原來我自己嘅問題係冇徹底解決到，好多嘢我都未能做到好好去溝通，好多嘢我都冇處理好，令家人失望。
喺搞笑、娛樂大家嘅背後，係朋友建議下去咗睇醫生，發現咗有抑鬱症，當時靠食藥控制，然而我再次做咗個錯誤決定，選擇咗飲酒去逃避現實，太太都有同我講，我係自己呃自己。壓力終爆煲，用咗呢幾日時間好好反省自己，工作忙唔係藉口，唔識溝通就要去學識溝通，我覺得好對唔住我屋企人，尤其是我太太同仔女，對唔住！ 我會用時間同行動去證明我會努力做好丈夫、爸爸同鄭中基嘅呢個決心。
接下來我要去解決自己同公司嘅問題，我完成手上嘅工作後，太太會陪我去美國參加戒酒中心嘅療程，都50幾歲嘞，我要去諗清楚點樣去面對自己，然後先可以面對大家，我希望返黎之後可以做一個更好嘅自己。呢幾日佔用咗大家嘅時間同埋媒體版面，好對唔住，我希望自己嘅問題真係可以自己去解決，多謝。
防止自殺求助熱線：
「情緒通」精神健康支援熱線：18111
香港撒瑪利亞防止自殺會： 2389 2222
生命熱線： 2382 0000
明愛向晴軒： 18288
社會福利署： 2343 2255
撒瑪利亞會熱線(多種語言)： 2896 0000
東華三院芷若園： 18281
醫管局精神健康專線： 2466 7350
賽馬會青少年情緒健康網上支援平台「Open 噏」：http://www.openup.hk
其他文章：
鄭中基預告將「離開」！透露有個人情緒及健康問題 與經理人何慶湘終止合作掀討論
余思敏忽然貼金句講男女感情問題 網民聯想鄭中基「浪子」舊情史
鄭中基台北巡演淚崩 12歲女成最強應援 發聲明澄清國內巡演假消息
鄭中基演唱會丨古天樂驚喜現身全場瘋狂歡呼 難得開金口鄭中基預咗超時被罰
鄭中基演唱會丨自爆為人父後逢周六日唔開工 連呢位影帝約佢都拒絕
獨家丨鄭中基難再請囡囡上台：佢青春期呀 首做演唱會主辦呻紅館規例成日改
