陳欣健還原74年碎屍案現場！死者只剩胸圍疑鬼掹腳揭線索：我攞槍篤住阿伯個頭

更新時間：10:00 2024-09-26
發佈時間：10:00 2024-09-26

現年79歲的陳欣健於60至70年代曾任職皇家香港警察，他參與的大案除了為人熟知寶生銀行挾持人質事件，還有旺角長城公寓謀殺案、先施大廈兇殺案等。早前翁靜晶曾在YouTube頻道「危險人物2.0」談及1974年發生的旺角長城公寓謀殺案，昨日（25日）「危險人物2.0」再播出訪問當年負責案件的陳欣健詳談案件細節。

相關閱讀：陳欣健憶74年「旺角長城公寓謀殺案」女死者遭凌遲死狀調查時曾收恐嚇信

陳欣健詳談調查「長城公寓謀殺案」細節：

1974年，旺角時鐘酒店「長城別墅」發生一宗恐怖謀殺案，34歲女死者劉富敏（原名劉金鈴）她離婚後成為一名「髮花」，在髮型屋提供性服務維生養媽媽及女兒。劉富敏當年8月15日被發現死於旺角洗衣街時鐘酒店「長城別墅」一間客房的床上，她的耳朵、耳珠、眼皮、鼻子被挖洞，嘴唇和兩邊乳房、一半的陰道、肚臍都被割掉，一共割了12塊肉。

與劉富敏開房男子獨自離開

據當時報導指，警方調查到8月14日身穿紅衣的劉富敏與一名報稱姓梁的男子同行至「長城別墅」幽會，入房時二人更面露笑容，期間沒有離開房間，直至早上7時，姓梁的男子先行離去，據目擊者口供指，男子離開時拿着兩個膠袋。由於「長城別墅」是時鐘酒店，當年亦未有規定訂房要留身份證資料，因此難以追查疑犯下落。

陳欣健形容屍體似馬騮

陳欣健當時就是負責該案的警員，他當時已任職警員9年，是一名CID探員，雖然是首次接觸謀殺案，但過去在其他部門工作亦見過死屍，因此到達「長城別墅」兇案現場他未有感害怕。陳欣健形容進入兇案現場的情景：「間房好細，細到我諗只有十平方左右，只有一張床、一個痰罐、一個衣櫃……冇喇！一張床蓋上一塊白布，冇浴室，得痰罐，然後有一塊布蓋住，塊布有一啲瘀血，係乾嘅！」當時法醫已經到場，陳欣健上前揭開蓋住死者的白布，「我又唔覺得恐怖，我覺得好似隻猴子，好似馬騮，因為頭髮短咗，見到頭型，（眉位置附近）係白色，冇血，呢啲位置（鼻及唇）係白色嘅，好似小丑，三角形，慢慢先揭開到下面，先見到其他身體部分都係白色。我就問驗屍官點解係白色，因為佢係死咗之後先被割嘅，血係沉澱喺身體下半部分，所以佢割嘅時候係唔會有血，我嗰時先發現『哇，大鑊』。」

陳欣健直覺不可解封現場

而據陳欣健形容現場環境，女死者劉富敏的隨身物只剩掛在衣櫃內的胸圍，衣物、手袋，甚至身份證都不在房內。陳欣健被「長城別墅」員工詢問，可否解封案發房間繼續做生意，陳欣健表示：「我經常心裡面有個感覺，有啲嘢未完，好得意嘅，我有啲感覺就係話，我覺得呢間房咩都冇，企喺度一眼睇得晒，但總覺得有啲嘢喺度，我又講唔出。我話唔好，都係封住先，唔畀入嚟，唔畀做生意。」

有人致電自認兇手

及後有個神秘電話打去快報，對方自稱「野狼」，承認是兇手，陳欣健憶述：「佢話警察係拉佢唔到，跟住佢話你返去望吓間房。我仲記得，我知道咗呢個消息，我就返到間房，自己夜晚坐喺嗰度，我喺度望『冇嘢呀，仲有咩呢』。」此時，陳欣健有直覺認為那部窗口式冷氣機有古怪，他嘗試開啟冷氣機的電源，但不成功，最後請電機工程署找人將冷氣拆下來，「一拉出嚟，割出來啲部位就放喺冷氣機頂部，即係藏喺牆同冷氣機中間，我一見到，佢已經收縮變成黑色，我立即拎去畀法醫將佢哋浸泡。等佢哋鬆軟返再縫返上死者身上，然後搵一個畫圖嘅人嚟畫出死者個樣。」

陳欣健家人愛做娛圈工作：

陳欣健發現線索

陳欣健得悉死者劉富敏有媽媽及女兒，卻被殺枉死，感到很不舒服，決心要為死者伸冤。警方在劉富敏工作的地方撬開放有她個人物品的木櫃找出一疊卡片，派人找卡片上的人，要求他們逐一提供不在場證據，其中有三個人找不到下落。陳欣健跟隨下屬到元州街一個單位找其中一名嫌疑人的叔叔，希望找到線索，「一入去有個老人家，我諗都有七十幾歲，跟住有一張碌架床，咩都冇喇……有兩個小朋友喺度，我仲記得佢落口供，我喺旁邊睇《歡樂今宵》。」離開時，陳欣健突然有古怪感覺：「當我行咗四、五步之後，我就行唔郁喇，我好似被釘喺原地，我唔知道點解就企咗喺度，我一直到處睇，我發覺自己焦點喺張碌架床度，都冇乜嘢呀，上層有個小朋友睡覺，旁邊有一個咖啡色皮箱。我即刻問『呢個咩嚟』，個阿伯話『唔係我㗎！』。佢一講唔係我㗎，我即刻醒咗。」老伯指皮箱是他外甥的，但對方身在澳門，最終他們決定撬開皮箱：「呢度同你睇報紙報導唔同，撬開之後，個女人啲衫喺晒度，除咗個胸圍，仲有死者張身份證、相……佢哋拍拖啲相。」陳欣健表示不理解兇手為何不將衣物拋棄。

疑兇可能是地盤工人

陳欣健追問老人其外甥下落，此時卻電話響，「我拎把槍出嚟對住阿伯個頭，我話『你聽電話，如果係佢打畀你，你唔好話有警察喺度，如果唔係就一槍打死你』。」但陳欣健的行為未有嚇到老伯，對方一聽電話就告訴對方單位有警察。其實陳欣健早在上門前，已為有人打電話到單位做定準備，安排好人手查電話打出位置，最終找到電話由嘉頓麵包對面一個地盤打來，他們即派人手到場雖然沒有找到目標，但至少知道致電的人是地盤工人。

相關閱讀：彭楚盈案丨翁靜晶親述撞鬼經歷！死者「現身」伸冤預先通水：證人唔嚟喇

兇手梁兆平承認殺人

直至有日，巡警拘捕了一名嘴邊有血的男子，憑他身上的卡片得悉他就是梁兆平，即是警方正想找的人，於是找梁兆平問話，但梁兆平說了一堆不合理的說話。陳欣健憶講述：「我就問『劉富敏嘅事你知道啦？我哋知係你殺，我哋想知你點殺佢，他就瞓喺度講『我用兩隻手指都殺得死佢』，佢係窒息死，被掐死，佢話『係，我就係咁啫，就係兩隻手指殺死佢』。」梁兆平更想撲向陳欣健做示範，「佢根本承認殺咗佢，我就問你用咩割佢啲肉出嚟，原來佢做地盤工，有一把鎅刀，佢成日用鎅刀。」該男子表示割死者不同部位出來是不想有人認出她，「咁割面咪得囉，點解要割下陰呢，我認為佢對呢個女人、呢個死者嘅痴愛程度已經唔係佢自己喇，其實係有精神分裂。只不過嗰個年頭唔美國咁，有律師帶佢去睇心理醫生又畀份報告出嚟，總之所以你話『已代為割肉』（字條），都係佢自己寫出嚟。」而梁兆平更承認他自稱「野狼」致電到快報挑戰警方。